İyunun 27-də Rusiyanın Yekaterinburq şəhərində Azərbaycan əsilli şəxslərə qarşı keçirilmiş xüsusi əməliyyat zamanı həyatını itirən iki şəxsin tanınmış jurnalist və ədəbiyyatşünas Seyfəddin Hüseynlinin qardaşları olduğu təsdiqlənib.

Jurnalist qardaşlarının ölümündən sonra ilk dəfə ictimaiyyətə açıqlama verən Seyfəddin Hüseynli deyib:

“Təkcə bir ailənin, bir el-obanın deyil, bütün Azərbaycanın acısını yaşayırıq. Yekaterinburqda baş verən faciədə ölkəmizin ləyaqətli oğulları qanunsuz şəkildə həbs olunub, amansız işgəncələrə məruz qalaraq öldürülüblər. Onlara qarşı saxta ittihamlarla qondarma ‘məhkəmə’ qurulub”, – deyə o bildirib.

O, Rusiya tərəfinin hadisəni ört-basdır etməyə çalışdığını da vurğulayıb:

“Elə təqdim edirlər ki, guya həyəcan keçiriblər və ürəktutmasından vəfat ediblər. Ancaq məhkəmə-tibbi ekspertiza hər şeyi ortaya qoyacaq. Hadisə ictimailəşəndən dərhal sonra dövlətimiz çevik reaksiya verdi, böyük bir faciənin daha da böyüməsinin qarşısı alındı. Prezident İlham Əliyevə, diaspor nümayəndələrimizə və xalqımıza təşəkkür edirəm. Onlar bu ailəyə dəstək verdilər”.

Mərhum qardaşların vida mərasimi Ağcabədidə keçiriləcək və onlar doğulduqları torpaqda dəfn olunacaqlar.

Hadisənin fonu:

İyunun 27-də səhər saatlarında Rusiya Federal Təhlükəsizlik Xidməti və OMON Yekaterinburqda azərbaycanlıların yaşadığı evlərə basqın edib. Nəticədə Məzahir və Akif Səfərov hadisə yerində ölüb, bir neçə nəfər isə saxlanılıb.

Azərbaycan Xarici İşlər Nazirliyi iyunun 28-də məsələ ilə bağlı rəsmi bəyanat yayıb, Rusiyanın müvəqqəti işlər vəkili XİN-ə çağırılıb və ona etiraz notası təqdim olunub.

Rusiya məhkəməsinin qərarı ilə:
• Məzahir, Akif və Ayaz Səfərovlar barəsində 22 sutkalıq inzibati həbs,
• Şahid Lalayev və Əhliman Gənciyev barəsində isə 72 saatlıq saxlanma qərarı çıxarılıb.

Hadisə ictimaiyyət və hüquq müdafiəçiləri arasında geniş rezonans doğurub. Avropa İttifaqının Bakıdakı səfiri Peter Mixalko da baş verən zorakılıq və insan hüquqları pozuntuları ilə bağlı narahatlığını ifadə edib.