İşgəncələr Əleyhinə Araşdırma Mərkəzinin sədri, hüquq müdafiəçisi Fikrət Cəfərli Cinayət Məcəlləsinin 147-ci (böhtan) maddəsi üzrə xüsusi ittiham qaydasında məhkəmə məsuliyyətinə cəlb olunub. Bu barədə Cəfərli iyulun 8-də şəxsi “Facebook” hesabında məlumat yayıb.

Onun sözlərinə görə, barəsindəki iddianı Vəkillər Kollegiyasının İntizam Komissiyasının üzvü, vəkil Elvin Əliyev qaldırıb. İddia Bakı şəhəri Binəqədi Rayon Məhkəməsində hakim Zamiq Bağırovun sədrliyi ilə keçirilən hazırlıq iclasında icraata qəbul edilib. Hakim iş üzrə Fikrət Cəfərlinin təqsirləndirilən şəxs qismində tanınması barədə qərar verib.

Elvin Əliyev məhkəməyə müraciətində iddia edib ki, Cəfərlinin rəhbərlik etdiyi İşgəncələr Əleyhinə Araşdırma Mərkəzinin “Facebook” səhifəsində onun işgüzar nüfuzuna xələl gətirən, böhtan xarakterli məlumatlar yayılıb. Həmin paylaşımlarda bildirilir ki, vəkil hazırda həbsdə olan keçmiş müvəkkilindən 10 500 manat pul alsa da, ona qarşı üzərinə götürdüyü hüquqi müdafiəni təmin etməyib və müvəkkili təhdid edib. Əliyev bu məlumatların yalan olduğunu və şərəf, ləyaqətinə xələl gətirdiyini bildirərək hüquqi tədbir görülməsini tələb edir.

Fikrət Cəfərli isə öz növbəsində yayılan məlumatın onun şəxsi fikri olmadığını, keçmiş müvəkkilin ifadələrinə əsaslandığını bildirib. O, bu iddianın siyasi sifarişlə irəli sürüldüyünü və Vəkillər Kollegiyasını tənqid etdiyi üçün məqsədli şəkildə hədəfə alındığını düşünür.

“Məni susdurmaq və Vəkillər Kollegiyası ətrafındakı neqativ halları gündəmə gətirməyimin qarşısını almaq istəyirlər. Hüquqi dövlət qurmaq əvəzinə, tənqidə cinayət işi ilə cavab verirlər”, – deyə hüquq müdafiəçisi qeyd edib.

İddia üzrə məhkəmə baxışı yaxın günlərdə Binəqədi Rayon Məhkəməsində davam edəcək. Hüquq müdafiəçiləri və vətəndaş cəmiyyəti təmsilçiləri bu hadisəni ifadə azadlığına qarşı basqı kimi qiymətləndirirlər.
https://www.facebook.com/isg.nc.l.r.leyhin.arasd.rmalar.m.rk.zi