Xəzər dənizi vasitəsilə Azərbaycana 510 kiloqram narkotik vasitənin gətirilməsinin qarşısı alınıb. Bu barədə Dövlət Sərhəd Xidməti məlumat verib.

Bildirilib ki, Xəzər dənizində keçirilmiş əməliyyatlar nəticəsində xüsusilə külli miqdarda narkotik keçirməyə cəhd göstərən mütəşəkkil cinayətkar qrup saxlanılıb. Sahil Mühafizəsinin nəzarət bölmələri və texniki müşahidə məntəqələrinin əməkdaşlığı sayəsində naməlum üzmə vasitəsi aşkar edilib və dövlət sərhədinin mühafizəsində olan sərhəd gəmiləri tərəfindən təqib olunub. Azərbaycan ərazi sularında həyata keçirilən əməliyyat nəticəsində üzmə vasitəsi Xaçmaz rayonunda sahilə yan almağa məcbur edilib.

İlkin dindirmə zamanı saxlanılan şəxslərin İran vətəndaşları olduğu müəyyən edilib: Atacani Tahir Xaləd (1979), Məxtumi Sadiq Ərazqurban (1987) və Qangerme Omid Çalce (1989). Onların üzərindən aşkar edilmiş “Garmin” GPS qurğusu vasitəsilə İran ərazisindən 1074 km məsafə qət edərək Türkmənistan ərazi sularından keçməklə Azərbaycana daxil olduqları müəyyən edilib.

Saxlanılmış “Layner” tipli üzmə vasitəsində və hadisə yerində aparılmış axtarış zamanı ümumi çəkisi 509 kq 800 qram narkotik aşkarlanıb. Əməliyyatın davamında hadisə yerində “Niva” markalı avtomobildə 4 Azərbaycan vətəndaşı şübhəli şəxs qismində saxlanılıb.

Faktla bağlı Baş Prokurorluqla birgə istintaq-əməliyyat tədbirləri davam edir.