Hindistanın “Sindur Əməliyyatı”ndan və may ayında Pakistanla yaşanan gərginlikdən sonra bu ölkədən Türkiyə və Azərbaycana səfər edən turistlərin sayı ciddi şəkildə azalıb.

“Indian Express” nəşri yazır ki, Pakistanı açıq şəkildə dəstəkləyən hər iki ölkə hazırda Hindistan ictimaiyyətinin boykot kampaniyası ilə üzləşib.

Hindistanın rəsmi turizm məlumatlarına əsasən, Azərbaycana gələn hindistanlı turistlərin sayı 56 faiz, Türkiyəyə səfər edənlərin sayı isə 33 faiz azalıb. May–avqust aylarında Azərbaycanı cəmi 44 min hindistanlı turist ziyarət edib — bu, ötən ilin eyni dövrü ilə müqayisədə təxminən yarıbayarı azdır. Türkiyədə isə eyni dövrdə bu göstərici 1,36 lakhdan (136 min) 90 minə enib.

Hindistanın aparıcı turizm şirkətləri — “MakeMyTrip”, “EaseMyTrip”, “Cox & Kings” və digərləri — may ayından etibarən Türkiyə və Azərbaycana səfərləri ya məhdudlaşdırıb, ya da tamamilə dayandırıb.
“MakeMyTrip” şirkəti mayın 14-də verdiyi açıqlamada bu iki ölkəyə sifarişlərin 60 faiz azaldığını, səfər ləğvlərinin isə 250 faiz artdığını bildirib.

İctimai etirazların artması fonunda şirkətlər bu istiqamətlər üzrə bütün reklam kampaniyalarını dayandırıb və müştərilərə “vacib olmadıqca səfər etməmək” tövsiyəsini veriblər.

Xatırladaq ki, Hindistan ordusu mayın 7-də “Sindur Əməliyyatı” çərçivəsində Pakistanda və Kəşmirin Pakistan nəzarətində olan hissəsində “terrorçu” hədəflərə raket zərbələri endirdiyini açıqlamışdı. Pakistan bu hücumları “müharibə aktı” adlandırıb, Hindistanın beş təyyarəsini vurduğunu və bir neçə hərbi obyektin məhv edildiyini bildirmişdi. Toqquşmalar nəticəsində onlarla insan həlak olub, çox sayda insan yaralanıb.

Bundan sonra Azərbaycan Xarici İşlər Nazirliyi bəyanat yayaraq “Pakistana qarşı mülki itkilərlə nəticələnən hücumları” pisləyib və “Pakistan xalqı ilə həmrəyliyini” ifadə edib. Bu bəyanat Hindistanda geniş narazılıq doğurub və sosial şəbəkələrdə #BoycottAzerbaijan həştəqi ilə kampaniya başlanıb.

Bir çox hindistanlı istifadəçilər sosial mediada həmvətənlərini Azərbaycana və Türkiyəyə səfərlərdən imtina etməyə çağırıb. 400 min izləyicisi olan “Mr. Sinha” adlı “X” istifadəçisi yazıb:

“Heç bir hindistanlı, terrora qarşı olan heç kim Azərbaycana getməməlidir. Hətta səfər planlaşdırmısınızsa belə, ləğv edin.”