Xaçmaz Rayon Polis Şöbəsinin (RPŞ) təşəbbüsü və təşkilatçılığı ilə rayon ərazisində fəaliyyət göstərən ümumtəhsil müəssisələrinin direktorları ilə görüş keçirilib.

Tədbir Xaçmaz şəhər 5 saylı tam orta məktəbində baş tutub. Görüşdə RPŞ-nin əməkdaşları, Regional Təhsil İdarəsinin nümayəndələri və pedaqoji kollektiv iştirak edib.

Müzakirələr zamanı yeniyetmələrlə işin təşkili, şagirdlərin davranış qaydalarına riayət etməsi, dərs prosesindən üzrsüz səbəblərlə yayınma hallarının qarşısının alınması, eləcə də valideyn məsuliyyətinin artırılması və ailə–məktəb–polis əməkdaşlığının əhəmiyyəti vurğulanıb.

Tədbirdə həmçinin məktəb ərazisinə kəsici-deşici alətlərin və digər qadağan olunmuş əşyaların gətirilməməsi, yeniyetmələrin hüquqazidd davranışlardan çəkindirilməsi və bu istiqamətdə polis əməkdaşları ilə qarşılıqlı əlaqələrin gücləndirilməsi məsələləri müzakirə edilib.

Xaçmaz RPŞ-nin rəisi, polis polkovniki Samir Məcidov çıxışında bildirib ki, təhsil müəssisələrinin yerləşdiyi inzibati ərazilərdə təhlükəsizlik və ictimai asayişin təmin olunması əsas prioritetlərdəndir. O, məktəblərdə hər hansı şübhəli hal müşahidə olunduqda dərhal polis orqanlarına məlumat verilməsinin vacibliyini qeyd edib.

Görüşdə, həmçinin erkən nikah hallarının qarşısının alınması, şagirdlərin internet və sosial şəbəkələrdən təhlükəsiz istifadəsi barədə maarifləndirici çıxışlar edilib.

Tədbirin sonunda iştirakçılar arasında mövzular ətrafında fikir mübadiləsi aparılıb.