Audiovizual Şura “Space TV” telekanalının efirində yayımlanan “Banu” proqramında bölgələrin birində keçirilmiş qohum evliliyinə dair toy şənliyinin nümayişi ilə bağlı kanala xəbərdarlıq edib.

Şuradan verilən məlumata görə, sözügedən kadrlar oktyabrın 8-də saat 22:06–23:09 aralığında efirdə yayımlanıb. Proqramın həmin buraxılışı 2025-ci il iyulun 1-də qüvvəyə minmiş “Azərbaycan Respublikasının Ailə Məcəlləsinə” edilən, qohumlar arasında evliliyin qadağan olunması ilə bağlı dəyişikliklər baxımından qiymətləndirilib.

Qanunvericiliyə əsasən, Ailə Məcəlləsinin 12.0.2-1-ci maddəsinə görə, ümumi bioloji baba və (və ya) nənəsi olan uşaqlar arasında nikah bağlanmasına yol verilmir.

Məsələ ilə bağlı “Space TV”yə sorğu göndərilib. Kanalın rəsmi cavabında bildirilib ki, süjetdə nümayiş olunan toy şənliyi qanun dəyişikliyindən əvvəl — 6 mart 2025-ci il tarixində baş tutub. Lakin lentə alınmış material texniki nöqsan səbəbindən oktyabr ayında efirə verilib.

Pozuntunun etiraf edilməsi və məsul əməkdaşla bağlı tədbirlərin görülməsi nəzərə alınaraq, Audiovizual Şura “Space TV”yə yalnız xəbərdarlıq edilməsinə qərar verib.