2025–2026-cı tədris ili bu gün – iyunun 13-də başa çatır və ölkə üzrə ümumi təhsil məktəblərində XI sinif şagirdləri üçün “Son zəng” tədbirləri təşkil olunur.

Məktəbəqədər və Ümumi Təhsil üzrə Dövlət Agentliyinin məlumatına görə, “Son zəng” mərasimlərinin keçirilmə vaxtı məktəblərə əvvəlcədən müəyyən çərçivədə tövsiyə edilib. Tədbirlərin səhər saat 08:00, 09:00 və ya 10:00-da başlaması və maksimum 2 saat davam etməsi nəzərdə tutulur.

Qaydalar çərçivəsində məzunların məktəbli formasında iştirakı tələb olunur, onların xarici görünüşü isə təhsil müəssisələrinin intizam qaydalarına uyğun və səliqəli olmalıdır.

Bu il ölkə üzrə ümumi təhsil müəssisələrinin XI siniflərini 116 min 550 şagird bitirir. Onlardan 55 954-ü qız, 60 596-sı oğlandır. Bakı Şəhəri üzrə Təhsil İdarəsinin tabeliyindəki məktəblərdə isə 37 222 şagird XI sinfi başa vurur.

Qeyd olunur ki, işğaldan azad edilmiş ərazilərdə yerləşən ümumilikdə 25 təhsil müəssisəsində də ilk dəfə “Son zəng” tədbiri keçirilir və həmin məktəblər üzrə 171 məzun bu günü qeyd edir.