Dövlət Şəhərsalma və Arxitektura Komitəsi Qazaxın işğaldan azad edilən Bağanıs Ayrım və Qızılhacılı kəndlərinin şəhərsalma əsaslandırmasını elm və təhsil nazirinin müavini Kənan Kərimzadənin vaxtilə hüquqi nümayəndəsi olduğu şirkətə həvalə edib.

"AbzasMedia"nın yeni araşdırmasında belə deyilir.

Araşdırmada yazılıb ki, 2024-cü ilin may ayında dövlət sərhəd xidmətinin general-mayoru Vüsal Sultanov Qazaxın işğaldan azad olunan 4 kəndi ilə bağlı ölkə başçısı İlham Əliyevə məruzə edib. Generalın məruzəsi həm də ona görə əlamətdar idi ki, bu kəndlər bir güllə belə atılmadan, danışıqlar yolu ilə geri qaytarılmışdı.

Uzun illər torpaqlarının həsrətilə yaşayan qazaxlı məcburi köçkünlər 30 il əvvəl geridə qoyduqları evlərindən qalan xarabalıqlara ürək ağrısı ilə baxır, öz yurd yerlərinə qayıdacaqları günü böyük həyəcanla gözləyirlər.

Araşdırmada deyilir ki, işğaldan azad edilən Bağanıs Ayrım kəndinin ən yaşlı sakini Şəmil Adıgözəlov Pezident İlham Əliyevə can sağlığı arzulayır, kəndə gedən kimi qurban kəsəcəyini deyir, Zərbəli Xasayev isə dünyasını dəyişən yaxın qohumlarının məzarlarını ziyarət edəcəyini bildirirdi.

Amma ömrünün ahıl yaşına çatan bu məcburi köçkünlər təsəvvürlərinə belə gətirmirlər ki, Bağanıs Ayrıma onlardan da əvvəl ayaq basanlar var. İşğaldan azad edilən kəndlərlə bağlı araşdırmalar "AbzasMedia"nı bu dəfə Prezident ailəsinə bağlı şirkətin hüquqi nümayəndəsi olmuş yüksək vəzifəli məmura aparıb çıxardı.

Araşdırmada göstərilir ki, 2024-cü ilin dekabrında Dövlət Şəhərsalma və Arxitektura Komitəsi "Design Bureau" Məhdud Məsuliyyətli Cəmiyyətilə iki satınalma müqaviləsi imzalayıb. Bu müqavilə Qazax rayonunun işğaldan azad olunmuş iki kəndinin şəhərsalma əsaslandırılmasının hazırlaması ilə bağlı olub.

Müqaviləyə görə, bu xidmətləri həyata keçirəcək şirkətə Bağanıs Ayrım kəndinin şəhərsalma əsaslandırılması üçün 194 min 818 manat, Qızılhacılı kəndinin şəhərsalma əsaslandırılması üçün isə 174 min 758 manat ödəniş edilib.

Dövlət Şəhərsalma və Arxitektura Komitəsi müqavilələri tender keçirmədən, şirkətlə birbaşa razılaşma əsasında bağlayıb. Ümumilikdə 370 min manat dəyəri olan müqavilələrin 2025-ci ilin sonuna qədər yekunlaşdırılacağı gözlənilir.