Azərbaycan Mərkəzi Bankının (AMB) İdarə Heyətinin ötən gün qəbul etdiyi qərarla 3 illik fasilədən sonra ölkədə daha bir sığorta şirkəti bağlandı – “Standard Insurance” ASC bazardan kənarlaşdırıldı. Bununla da, “Standard” brendinin Azərbaycanın maliyyə bazarını tərk etməsi istiqamətində daha bir addım atıldı.

Keçmiş nazirin holdinqi

“Standard Insurance” Sığorta Şirkəti 2002-ci ildən “AB Standard” QSC Şirkətlər Qrupunun tərkibində fəaliyyət göstərirdi. Holdinqin keçmiş iqtisadi inkişaf naziri Heydər Babayevə məxsus olması kimsəyə sirr deyil. Onun oğulları müxtəlif vaxtlarda holdinqə daxil olan şirkətlərin rəhbərliyində təmsil olunublar. “AB Standard”ın tərkibinə “Standard Insurance”lə yanaşı lisenziyası ləğv olunmuş “Bank Standard” QSC, qiymətli kağızlar bazarındakı yeni qaydalarla əlaqədar fəaliyyətini dondurmuş “Standard Kapital” MMC, eləcə də “Standard Lizinq” MMC daxildir.

Keçmiş “Most-Bank”

Uzun illər Azərbaycanın aparıcı, sistem əhəmiyyətli banklarından biri olan “Bank Standard” maliyyə bazarına 1998-ci ildə, Rusiyanın “Most Bank”ın törəməsi kimi daxil olmuş, 2000-ci illərin əvvəllərində rebrendinq etmişdi. Bazarda bir çox yeniliklərə imza atan “Bank Standard”Azərbaycan manatının 2015-ci ildəki ikili devalvasiyasından sonra ciddi problemlərlə üzləşdi və öhdəliklərini yerinə yetirməkdə çətinlik çəkdi. Bankın xilas edilməsi istiqamətində görülən tədbirlər nəticə vermədiyindən 2016-cı ildə onun bazardan kənarlaşdırılmasına - lisenziyasının ləğv edilməsinə qərar verildi və ləğvetmə prosesi hələ də, davam edir.

Banka bağlı sığorta şirkəti

Ötən gün lisenziyası ləğv edilmiş “Standard Insurance” Sığorta Şirkəti isə maliyyə bazarına 2002-ci ildə daxil olub. Onun da üzləşdiyi problemlərin kökü devalvasiyaya və bağlı olduğu bankın – “Bank Standard”ın maliyyə vəziyyətinin pisləşməsinə gedib çıxır. Əksər yerli sığorta şirkətləri kimi “Standard Insurance”in da topladığı sığorta haqlarında bank kreditləri həlledici rola malik olub. Odur ki, “qohum” bankın bağlanmasından keçən 3-4 il ərzində sığorta şirkətinin problemləri getdikcə dərinləşib, maliyyə qurumu kapitalını itirib, müştəriləri qarşısında öhdəliklərini yerinə yetirə bilməyib.

Yeni qanuna uyğunlaşa bilməyən şirkət

“Standard Kapital” investisiya şirkəti isə maliyyə bazarına 2004-cü ildə daxil olub və 11 il normal fəaliyyət göstərib. 2016-cı ildə Azərbaycanda “Qiymətli kağızlar bazarı haqqında" yeni qanunun qüvvəyə minməsi onun fəaliyyətinin dondurulması ilə nəticələnib.

Brendin yeganə təmsilçisi

Hazırda “Standard” brendi maliyyə bazarında yalnız “Standard Lizinq”lə təmsil olunur. 2006-cı ildə yaradılmış bu şirkət hələ ki, “ayaq üstə qalmağı” bacarır. Bununla belə, son 5 ildə “AB Standard”a məxsus 3 maliyyə qurumunun bağlanması belə deməyə əsas verir ki, “Standard” brendi bazarı tərk etmək üzrədir. //REPORT.AZ//