Gürcüstanda müxalifətdə olan Vahid Milli Hərəkat partiyasının lideri Tina Bokuçava ölkədə ciddi rezonansa səbəb olan hadisə barədə açıqlama verib. Onun sözlərinə görə, həyat yoldaşı Kote İoseliani iyunun 8-nə keçən gecə naməlum şəxslər tərəfindən oğurlanıb və psixoloji təzyiqlərə məruz qalıb.

Bokuçava bildirib ki, hadisə Tbilisidə, yaşadıqları binanın yaxınlığında baş verib. Onun sözlərinə görə, maskalı və silahlı beş nəfər Kote İoselianiyə hücum edərək onu zorla avtomobilə mindirib, gözlərini bağlayaraq və əllərini qandallayaraq naməlum istiqamətə aparıblar.

“Ona ağır fiziki xəsarət yetirilməyib, lakin maşında gözləri bağlı və qandallanmış vəziyyətdə aparılıb. Bizə verilən məlumata görə, Kote ehtimal ki, “Modul” binasına gətirilib və orada 8 saat ərzində psixoloji təzyiqlərə məruz qalıb,” – deyə Tina Bokuçava qeyd edib.

Hadisədən sonra Kote İoselianinin üzr istədiyi bir video yayımlanıb. Videoda o, 2018-ci ildə milyarder və hakimiyyətin əsas fiqurlarından biri olan Bidzina İvanişvilinin oğlu Uta İvanişvili haqqında səsləndirdiyi fikirlərə görə ikinci dəfə üzr istəyib. Bokuçavanın fikrincə, bu üzrxahlıq tamamilə məcburi və siyasi məqsədli bir təzyiqin nəticəsidir.

“Kote həmin açıqlamaya görə 2018-ci ildə dərhal üzr istəmişdi. Dünən yayımlanan video və oğurlanma bu bəyanatla bağlı deyil. Bu, mənə qarşı siyasi təzyiq kampaniyasının bir hissəsidir. Hakimiyyət məni həbs edə bilmədiyi üçün ailəmə təzyiqlə susdurmağa çalışır,” – deyə Bokuçava bildirib.

O, çıxışında konkret adlar da çəkib:

“Bidzina İvanişvili, onun ailə üzvləri, bu əmri verənlər və icra edənlər – o cümlədən keçmişdə Vano Merabişvilinin sadiq adamı olmuş Gela Geladze, hamınıza səslənirəm: Mən qorxmuram, susmayacağam. Sizin zorakı və satqın rejiminizin süqutu üçün mübarizəni davam etdirəcəyəm.”

Hadisə Gürcüstanda müxalifətə qarşı artan təzyiqlərin və siyasi atmosferin daha da gərginləşdiyini göstərir. Hadisə beynəlxalq təşkilatlar və yerli hüquq müdafiəçiləri tərəfindən də diqqətlə izlənilir.