Azərbaycan Prezidenti İlham Əliyev və Ermənistanın Baş naziri Nikol Paşinyan avqustun 31-də Qırğızıstanın paytaxtı Bişkekdə görüşüblər.

Görüş Şanxay Əməkdaşlıq Təşkilatının Zirvə toplantısı çərçivəsində keçirilib.

Tərəflər 8 avqust 2025-ci ildə keçirilmiş Vaşinqton Sülh Zirvəsinin nəticələrini, ABŞ Prezidenti Donald Trampın şahidliyi ilə imzalanmış Birgə Bəyannaməni və Azərbaycan-Ermənistan sülh sazişinin razılaşdırılmış mətninin paraflanmasını müzakirə ediblər. Liderlər bu prosesin tarixi əhəmiyyət daşıdığını vurğulayıblar.

Görüşdə Azərbaycan neft məhsullarının Ermənistana ixracı, üçüncü ölkələrdən taxıl və digər məhsulların Azərbaycan ərazisindən Ermənistana tranziti, həmçinin iki ölkə arasında ticarət əlaqələrinin qurulması məsələlərinə toxunulub.

Əliyev və Paşinyan işgüzar dairələr arasında təmasları müsbət qiymətləndirərək iqtisadi, ticarət və enerji sahələrində əməkdaşlığın daha da genişləndirilməsi imkanları barədə fikir mübadiləsi aparıblar.

Danışıqlar zamanı Azərbaycan-Ermənistan dövlət sərhədinin delimitasiyası da əsas müzakirə mövzularından biri olub. Tərəflər müvafiq dövlət komissiyalarının fəaliyyətini davam etdirməsinin vacibliyini qeyd ediblər.

Liderlər, həmçinin “Beynəlxalq Sülh və Rifah naminə Tramp Marşrutu”nun (TRIPP) həyata keçirilməsi üçün atılacaq növbəti praktiki addımları müzakirə ediblər. Marşrut boyunca bağlantı layihələrinin əhəmiyyəti vurğulanıb.

Görüşdə parlamentarilər və vətəndaş cəmiyyəti nümayəndələri arasında təmasların qarşılıqlı etimadın yaradılmasına və daha geniş sülh gündəliyinə töhfəsi də müsbət qiymətləndirilib.

İlham Əliyev və Nikol Paşinyan birbaşa ikitərəfli təmasları davam etdirmək, davamlı sülhün möhkəmləndirilməsi, dövlətlərarası münasibətlərin normallaşdırılması və regional bağlantıların inkişafı istiqamətində növbəti addımlar atmaq barədə razılığa gəliblər.