Azərbaycan Prezidenti İlham Əliyev Özbəkistan Prezidenti Şavkat Mirziyoyevi ölkəsinin müstəqilliyinin 35-ci ildönümü münasibətilə təbrik edib.

İlham Əliyev təbrik məktubunda öz adından və Azərbaycan xalqı adından Şavkat Mirziyoyevə və Özbəkistan xalqına ən xoş arzularını çatdırıb.

Prezident qeyd edib ki, müstəqillik əldə etdikdən sonra Özbəkistan dinamik inkişaf yolu keçib, müxtəlif sahələrdə mühüm nailiyyətlər qazanıb, regionda və beynəlxalq aləmdə nüfuzunu gücləndirib.

İlham Əliyev Özbəkistanın əldə etdiyi uğurlarda Şavkat Mirziyoyevin rəhbərliyi ilə həyata keçirilən islahatların rolunu xüsusi vurğulayıb.

“Qardaş ölkə və müttəfiq olaraq Özbəkistanın hər bir uğurunu öz uğurumuz hesab edir, bundan qürur duyuruq”, – deyə Azərbaycan Prezidenti bildirib.

Dövlət başçısı Azərbaycanla Özbəkistan arasındakı münasibətlərin hazırda ən yüksək səviyyədə olduğunu qeyd edib. Onun sözlərinə görə, ortaq tarixi və mədəni bağlara, dostluq və qardaşlığa əsaslanan əlaqələrin daha da inkişaf etdirilməsi Azərbaycan üçün prioritet istiqamətlərdən biridir.

İlham Əliyev iki ölkə arasında müttəfiqliyin və çoxşaxəli əməkdaşlığın bundan sonra da gücləndiriləcəyinə əminliyini ifadə edib.

Azərbaycan Prezidenti Şavkat Mirziyoyevə möhkəm cansağlığı və fəaliyyətində uğurlar, Özbəkistan xalqına isə rifah, firavanlıq və yüksəliş arzulayıb.