USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Qərbi Kaspi Universitetinin müəllimi sosial media paylaşımlarına görə işdən çıxarıldığını iddia edir
Qərbi Kaspi Universitetinin müəllimi Yusif Bidan (Yusifzadə) sosial şəbəkələrdəki paylaşımlarına görə işdən azad edildiyini bildirib.
O, sentyabrın 23-də “Facebook” səhifəsində paylaşdığı açıqlamasında qeyd edib ki, universitetdə dərslərə sentyabrın 15-də başlayıb, lakin cəmi üç gün sonra rəhbərlik ona sosial media paylaşımları ilə bağlı xəbərdarlıq edib. Sentyabrın 18-də isə “WhatsApp” vasitəsilə əmək müqaviləsinə xitam veriləcəyi barədə mesaj göndərilib.
“Əmək müqaviləsiz işlədiblər”
Y.Bidan iddia edir ki, ümumiyyətlə, onunla universitet arasında əmək müqaviləsi imzalanmayıb. Buna baxmayaraq, rəhbərlik ondan fənn proqramı, sillabuslar, mühazirələr hazırlamağı və dərs keçməyi tələb edib:
“Qısacası, Qərbi Kaspi Universiteti məni əmək müqaviləsi olmadan, əmək müqaviləsi imzalamaq vədi ilə işlədib. Fənn proqramı, sillabuslar, mühazirələr yazdırıb, dərslər keçirdib, amma heç bir rəsmi səbəb göstərmədən işdən azad edib. Bu, açıq şəkildə istismardır”.
İşdən çıxarılmaya rəsmi izah verilməyib
Müəllim deyir ki, universitetdən rəsmi izahat ala bilməyib. Ona yalnız fakültə dekanının zəng edərək, analıq məzuniyyətində olan müəllimin dərsə qayıtdığını və dərsləri onun davam etdirəcəyini bildirdiyi açıqlanıb. Yusif Bidan isə bu izahın gerçək olmadığını iddia edir:
“Dekan dedi ki, analıq məzuniyyətində olan müəllim doğuşdan dərhal sonra dərs keçməyə qərar verib. Bu açıq yalan idi. Mənim dərslərim boş keçib”.
Məhkəməyə müraciət ediləcək
Yusif Bidan işdən azad edilməsini qanunsuz hesab etdiyini bildirərək, məhkəməyə müraciət edəcəyini açıqlayıb.
Qərbi Kaspi Universitetindən isə müəllimin iddialarına hələlik münasibət bildirilməyib.
