“AbzasMedia işi” üzrə həbs olunan jurnalistlərdən Elnarə Qasımova saxlanılma şəraitindən narazılığını bildirib.

Bu barədə Elnarə Qasımovanın anası Natavan Qasımova məlumat verib. Onun sözlərinə görə, qızı və həmkarı Nərgiz Absalamova müəssisəyə köçürüləndə siqaret çəkilməyən otaqda saxlanılacaqları bildirilsə də, hazırda siqaret çəkən məhbuslarla eyni kamerada qalırlar.

Natavan Qasımova əlavə edib ki, qızı bronxial astma xəstəsidir və siqaret tüstüsü onun səhhətində ciddi problemlər yaradır:

“Elnarə deyir ki, otaqda siqaret çəkirlər, nəfəs almaqda çətinlik çəkir. Halbuki onlara əvvəlcədən başqa şərait vəd olunmuşdu.”

Elnarə Qasımovanın sözlərinə görə, Penitensiar Kompleksdə qadınlar üçün cəmi iki kamera açılıb və həmin kameralarda ümumilikdə 12 qadın saxlanılır.

Natavan Qasımova həmçinin qeyd edib ki, həbsxanaya çatdırılan müstəqil mediada dərc olunmuş xəbərlər jurnalistlərə verilmir:

“Müəssisə rəhbəri gətirdiyimiz xəbərləri əlimizdən alır, ‘qızlara verəcəyik’ deyirlər, amma sonradan öyrənirik ki, vermirlər. Jurnalistlər informasiya blokadasında saxlanılırlar.”

Xatırladaq ki, “AbzasMedia işi” üzrə 2025-ci ilin iyununda Bakı Ağır Cinayətlər Məhkəməsinin hökmü ilə media qurumunun direktoru Ülvi Həsənli, baş redaktoru Sevinc Vaqifqızı, araşdırmaçı-jurnalist Hafiz Babalı və iqtisadçı Fərid Mehralızadə 9 il, reportyorlar Elnarə Qasımova və Nərgiz Absalamova 8 il, direktor müavini Məhəmməd Kekalov isə 7 il 6 ay müddətinə azadlıqdan məhrum ediliblər.

Onlar qaçaqmalçılıq və digər maddələr üzrə təqsirli biliniblər. Lakin jurnalistlər irəli sürülən ittihamları rədd edir və həbslərinin apardıqları korrupsiya araşdırmalarına görə siyasi sifariş olduğunu bildirirlər.

Sentyabrın 26-da “AbzasMedia işi” üzrə həbsdə olan jurnalistlər — Sevinc Vaqifqızı, Elnarə Qasımova və Nərgiz Absalamova Lənkəranın Qurumba kəndində yerləşən Penitensiar Kompleksə köçürülüblər.