USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Gürcüstanda mühacir həyatı yaşayan jurnalist Əfqan Sadıqovun yenidən saxlanıldığı bildirilir
Gürcüstanda məcburi mühacir həyatı yaşayan azərbaycanlı jurnalist, Azel.TV xəbər portalının baş redaktoru Əfqan Sadıqovun yenidən saxlanıldığı bildirilir. Bu barədə onun həyat yoldaşı Sevinc Sadıqova sosial şəbəkədə məlumat paylaşıb.
Sevinc Sadıqovanın sözlərinə görə, Əfqan Sadıqov dünən axşam saatlarında Gürcüstan polisi tərəfindən saxlanılıb. Jurnalist əvvəlcə “yoxa çıxıb”, daha sonra isə onun polis tərəfindən həbs edildiyi təsdiqlənib: “Gürcüstan polisi əvvəlcə Əfqan Sadıqovun saxlanılmasını inkar etdi, yəni onlar cinayət törədib və bunu gizlətməyə çalışırlar. Daha sonra ictimai təzyiq və bir neçə müraciətdən sonra etiraf etdilər ki, bəli, Əfqan Sadıqovu biz saxlamışıq. Bu, Gürcüstan polisinin saxtakarlıq və yalançılıqla məşğul olduğunu göstərir”, — deyə Sevinc Sadıqova bildirib.
O, həmçinin qeyd edib ki, jurnalistə qarşı irəli sürüləcək istənilən ittiham siyasi sifariş olacaq: “Bu, rejimin siyasi sifarişi ilə qurulmuş bir işdir. Bidzina İvanişvili rejiminin bu addımı bir daha göstərir ki, bu rejim diktaturadır.”
Əfqan Sadıqov son illərdə Azərbaycanda hakimiyyəti tənqid edən çıxışları və yazıları ilə tanınıb. O, 2023-cü ilin sonunda ailəsi ilə birlikdə Gürcüstana mühacirət edib. Daha əvvəl, 2024-cü ilin avqustunda da Gürcüstan polisi tərəfindən saxlanılmış və onun Azərbaycana ekstradisiyası məsələsi gündəmə gəlmişdi.
Hazırda Gürcüstan Daxili İşlər Nazirliyi və ya digər rəsmi qurumlar tərəfindən hadisə ilə bağlı yeni açıqlama verilməyib.
