Xaricdə yaşayan ictimai fəallar Abid Qafarov və Beydulla Manafov Azərbaycanın Baş Prokurorluğuna çağırılıblar. Bu barədə məlumat İctimai Televiziya vasitəsilə yayımlanıb.

Məlumata görə, 1981-ci il təvəllüdlü Abid Abdin oğlu Qafarov barəsində 252006069 saylı cinayət işi üzrə Azərbaycan Cinayət Məcəlləsinin 281.2-ci maddəsi (dövlət əleyhinə yönələn çağırışlar) ilə təqsirləndirilən şəxs qismində cəlbetmə haqqında qərar qəbul edilib.

Qafarov istintaq orqanından yayınaraq ölkə hüdudlarından kənarda gizləndiyi üçün barəsində axtarış elan olunub və Binəqədi Rayon Məhkəməsinin qərarı ilə qiyabi həbs qətimkan tədbiri seçilib.
Daha sonra, 18 sentyabr 2025-ci il tarixdə ittihamın məzmununa əlavə və dəyişikliklər edilərək Abid Qafarov Cinayət Məcəlləsinin 220.2 və 281.2-ci maddələri ilə də təqsirləndirilən şəxs qismində cəlb edilib.

Abid Qafarova izah edilib ki, o, 20 noyabr 2025-ci il, saat 12:00-da Bakı şəhəri, Binəqədi rayonu, Süleyman Sani Axundov küçəsi 160 ünvanında yerləşən Baş Prokurorluğun İstintaq Baş İdarəsinə şəxsiyyətini təsdiq edən sənədlə birlikdə gəlməlidir.

Eyni zamanda, xaricdə yaşayan 1947-ci il təvəllüdlü Beydulla Ənvər oğlu Manafov da Baş Prokurorluğa çağırılıb.

Onun barəsində 25200606 saylı cinayət işi üzrə Azərbaycan Cinayət Məcəlləsinin 281.2 və 283.1-ci maddələri ilə təqsirləndirilən şəxs qismində cəlbetmə haqqında qərar qəbul edilib. Manafov da istintaq orqanından yayınaraq ölkə hüdudlarından kənarda gizləndiyi üçün axtarışa verilib və Binəqədi Rayon Məhkəməsinin qərarı ilə qiyabi həbs qətimkan tədbiri seçilib.

Beydulla Manafova da bildirilir ki, o, 20 noyabr 2025-ci il, saat 14:00-da eyni ünvanda – Baş Prokurorluğun İstintaq Baş İdarəsində olmalıdır.