“Meydan TV işi” üzrə həbs olunan jurnalist Ülviyyə Əli (Quliyeva) barəsində seçilmiş həbs qətimkan tədbirinin müddəti daha 1 ay uzadılıb.

Bu barədə məlumatı jurnalistin yaxınları sosial şəbəkələrdə paylaşıblar. Bildirilib ki, noyabrın 26-da Xətai Rayon Məhkəməsində keçirilən prosesdə prokurorluğun təqdimatı təmin edilərək, həbs müddəti 27 dekabr 2024-cü il tarixinədək uzadılıb.

Məlumata görə, Ülviyyə Əli məhkəmədə müdafiə çıxışı etməkdən imtina edərək, bunu “mənasız” adlandırıb:

“Bu, sadəcə yuxuma haram qatmaqdan başqa bir şey deyil”, – deyə o bildirib.

Jurnalist çıxış əvəzinə “Xoruz” adlı şeiri səsləndirib və şeirin məhkəməyə nə qədər aidiyyəti varsa, ittihamların da ona o qədər aidiyyəti olduğunu vurğulayıb.

Ülviyyə Əli mayın 7-də “Meydan TV işi” üzrə saxlanılıb. O, əvvəlcə “Amerikanın Səsi” ilə əməkdaşlıq edib, daha sonra sosial media hesablarında siyasi motivli məhkəmələri işıqlandırmaqla fəaliyyətini davam etdirib.

Xatırladaq ki, 2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aysel Umudova, Aytac Tapdıq, Xəyalə Ağayeva, Natiq Cavadlı, vətəndaş cəmiyyəti üzvü Ülvi Tahirov saxlanılmışdı. Sonradan digər media əməkdaşları — Şəmşad Ağayev (Ağa), Nurlan Libre, Fatimə Mövlamlı, Ülviyyə Əli və fotoqraf Əhməd Muxtar da eyni iş üzrə həbs edilib.

Onların hamısına qarşı əsas ittiham qaçaqmalçılıq maddəsi ilə irəli sürülüb. Jurnalistlər özlərini təqsirli bilmədiklərini bildirirlər.