Gədəbəy Rayon İcra Hakimiyyətinin keçmiş başçısı Saleh Rüstəmovun dünən – noyabrın 29-da Dövlət Təhlükəsizlik Xidmətinin (DTX) Gədəbəy şöbəsinin əməkdaşları tərəfindən saxlanılaraq Bakıya aparıldığı bildirilir. Lakin artıq 24 saatdan çoxdur ki, onun harada saxlanılması barədə ailəsinə heç bir məlumat verilmir.

Ailəsi: “Əlavə paltar götürməyə belə icazə vermədilər”

Saleh Rüstəmovun oğlu Sezgin Rüstəmov sosial şəbəkədə yazıb ki, saxlanılma zamanı DTX əməkdaşları onların narahat olmamasını, “uzağı sabaha buraxılacağını” bildiriblər:

“Atam əlavə paltar götürmək istəyəndə buna ehtiyac olmadığını dedilər. Bir sutka keçib və biz atamı tapa bilmirik. 2018-ci ildə də günlərlə yerini bilməmişdik, sonradan işgəncələrə məruz qaldığı ortaya çıxdı. İndi yenidən eyni vəziyyətdir.”

Vəkil: “DTX-dan bildirildi ki, o, ora gətirilməyib”

Rüstəmovun vəkili Bəhruz Bayramov Meydan TV-yə açıqlamasında deyib ki, o, bu gün – noyabrın 30-da DTX ilə əlaqə saxlayıb, istintaq qrupunun rəhbəri Saleh Rüstəmovun oraya gətirilmədiyini bildirib:

“Onu noyabrın 29-da axşam aparıblar. Həbsdən çıxdıqdan sonra Qazaxıstanda işləyirdi, çünki Rusiyada FTX onu sıxışdırırdı. Bacısı qızı vəfat etdiyinə görə Azərbaycana qayıtmışdı. Burada da ona çıxış qadağası qoydular. Niyə bu qadağa qoyulub – bu barədə DİN, DTX və Baş Prokurorluğa sorğu göndərmişəm, cavab verilməyib.”

Kimdir Saleh Rüstəmov?

Saleh Rüstəmov daha əvvəl AXCP-yə qanunsuz maliyyə yardımı göstərmək ittihamı ilə həbs edilmişdi. O, ittihamı qəbul etmirdi. Həbs müddəti bitmədən prezidentin əfv sərəncamı ilə azadlığa çıxmışdı.

Ölkədə paralel saxlanmalar

Noyabrın 29-da həmçinin bir neçə siyasi fiqurun saxlanıldığı barədə məlumat yayılıb:
• AXCP sədri Əli Kərimli,
• Partiyanın Rəyasət Heyətinin üzvü Məmməd İbrahim,
• Partiyanın digər funksionerləri.

Bundan başqa, Milli Şuranın üzvü Gültəkin Hacıbəylinin İstanbulda saxlanıldığı və Azərbaycana deportasiya edilə biləcəyi barədə məlumat var.

Əli Kərimli və Məmməd İbrahimin evlərində aparılan axtarışların Prezident Administrasiyasının sabiq rəhbəri Ramiz Mehdiyevlə əlaqədar başlayan cinayət işi ilə bağlı olduğu bildirilir.