“Amnesty International” Əli Kərimlinin həbsi ilə bağlı bəyanat yayıb

“Amnesty International” Beynəlxalq İnsan Haqları Təşkilatı Azərbaycan Xalq Cəbhəsi Partiyasının (AXCP) sədri Əli Kərimlinin həbsi ilə bağlı sərt tənqidi bəyanat yayıb.

Təşkilatın Şərqi Avropa və Mərkəzi Asiya üzrə direktor müavini Denis Krivoşeyev bildirib ki, Əli Kərimlinin həbsi Azərbaycan hakimiyyətinin ölkəni daha da avtoritarlaşdırdığını bir daha göstərir:

“Hakimiyyət siyasi müxalifəti tamamilə əzməkdə və ölkədəki hər cür narazılığı boğmaqda sərhəd tanımır. Müxalifət liderini ‘hakimiyyəti ələ keçirməyə cəhd’ ittihamı ilə həbs etmək, Azərbaycan hökumətinin nə qədər irəli getməyə hazır olduğuna şübhə edən hər kəsə bir xəbərdarlıqdır.”

Krivoşeyev bildirib ki, hakimiyyət orqanları iddia edilən cinayətlə bağlı ağlabatan dəlillər təqdim edə bilmirsə, Əli Kərimli azadlığa buraxılmalıdır:

“Onu saxlamaqla və xarici aləmlə əlaqəsini tamamilə kəsməklə, ədalətli məhkəmə araşdırması hüququndan məhrum etməklə, hökumət müxalifət nümayəndələrinə, jurnalistlərə və fəallara qarşı siyasi motivli həbslər dalğasını davam etdirməkdə nə qədər qərarlı olduğunu göstərdi.”

Xatırladaq ki, dekabrın 1-də Əli Kərimli və AXCP Rəyasət Heyətinin üzvü Məmməd İbrahim barəsində 2 ay 15 gün müddətinə həbs qətimkan tədbiri seçilib. Onlar noyabrın 29-da Dövlət Təhlükəsizliyi Xidməti tərəfindən saxlanılıblar.

Hər iki şəxsə qarşı Cinayət Məcəlləsinin 278.1-ci maddəsi — hakimiyyəti zorla ələ keçirməyə və konstitusiya quruluşunu zorla dəyişdirməyə cəhd ittihamı irəli sürülüb.

Bir çox media orqanları bu həbslərin Prezident Administrasiyasının sabiq rəhbəri Ramiz Mehdiyevin DTX-da istintaq olunan cinayət işi ilə əlaqəli ola biləcəyini yazırlar.

Hadisələr Azərbaycanda son aylar etirazlara, müxalifətə və müstəqil medianın fəaliyyətinə qarşı təzyiqlərin artdığı bir vaxtda baş verir.