“Meydan TV işi” üzrə məhkəmə prosesi başlayır

Bakı Ağır Cinayətlər Məhkəməsində “Meydan TV işi” üzrə həbs olunan şəxslərin məhkəmə prosesi başlayır. Cinayət işi artıq məhkəməyə göndərilib və yaxın günlərdə hakim Aytən Əliyevanın sədrlik edəcəyi prosesdə Vüqar Quliyev və Elmin Rüstəmov da kollegiyada iştirak edəcəklər.

Hazırda iş üzrə 12 nəfər həbsdədir. Onlar arasında Meydan TV əməkdaşları — Aynur Qənbərova (Elgünəş), Aysel Umudova, Natiq Cavadlı, Aytac Əhmədova (Tapdıq), Xəyalə Ağayeva və Ramin Cəbrayılzadə (Deko) 2024-cü il dekabrın 6-dan həbsdədirlər. Həmin gün vətəndaş cəmiyyətinin üzvü, Bakı Jurnalistika Məktəbinin direktor müavini Ülvi Tahirov da saxlanılıb.

Cinayət işi çərçivəsində fevralda üç jurnalist — Şəmşad Ağayev (Ağa), Nurlan Qəhrəmanlı (Libre) və Fatimə Mövlamlı, may ayında Ülviyyə Quliyeva (Əli), avqust ayında isə fotojurnalist Əhməd Muxtar həbs olunub.

İlkin olaraq jurnalistlərə Cinayət Məcəlləsinin 206.3.2-ci maddəsi (qabaqcadan əlbir olan bir qrup tərəfindən qaçaqmalçılıq) üzrə ittiham verilmişdi. İstintaqın sonunda ittihamlar genişləndirilib: qanunsuz sahibkarlıq (192), cinayət yolu ilə əldə edilən əmlakın leqallaşdırılması (193-1), vergidən yayınma (213) və digər maddələr əlavə olunub. Onlar xaricdən valyuta qaçaqmalçılığı ilə gətirməkdə günahlandırılır və bu maddələr üzrə 12 ilədək həbs cəzası nəzərdə tutulur.

Jurnalistlər ittihamları rədd edir və bildirirlər ki, həbs tənqidi fəaliyyətlərinə görə həyata keçirilib.