Azərbaycan Xalq Cəbhəsi Partiyası (AXCP) iki üzvünün sosial şəbəkələrdə yazdıqları fikirlərə görə inzibati qaydada həbs edildiyini açıqlayıb.

Partiyadan verilən məlumata görə, AXCP-nin Binəqədi rayon şöbəsinin üzvü Teymur Salahov və Yevlax rayon şöbəsinin üzvü Şamil Cəfərov polis tərəfindən saxlanılaraq inzibati həbs cəzası alıblar.

Bildirilib ki, Teymur Salahov yanvarın 17-də Göyçay Rayon Polis Şöbəsinə çağırılıb. Yanvarın 18-də polis bölməsinə gedən AXCP üzvü sosial şəbəkədə yazdığı şərhə görə saxlanılıb və məhkəmənin qərarı ilə 10 sutka inzibati həbs cəzası verilib.

Partiyanın Yevlax rayon şöbəsinin üzvü Şamil Cəfərov isə yanvarın 19-da yaşadığı evdən aparılıb. AXCP-nin yaydığı məlumata əsasən, ona 15 sutka inzibati həbs verildiyi bildirilir.

AXCP sədrinin müavini Seymur Həzi həbslərin siyasi motivli olduğunu bildirib. Onun sözlərinə görə, son dövrlər ölkə üzrə partiyaya qarşı sistemli təzyiq kampaniyası aparılır:

“Bütün ölkə boyu AXCP-yə qarşı repressiya gedir. Ayrı-ayrı rayonlarda da bu siyasət həyata keçirilir və tamamilə siyasi xarakter daşıyır. Bu insanlar cinayətkar deyillər, sadəcə sosial şəbəkələrdə hökumətin fəaliyyətini tənqid ediblər və buna görə həbs olunublar. Saxlanılanlara qarşı konkret hansı ittihamların irəli sürüldüyü hələlik bəlli deyil, bunu dəqiqləşdirməyə çalışırıq”.

Məsələ ilə bağlı rəsmi qurumlardan münasibət almaq mümkün olmayıb. Lakin rəsmi şəxslər, bir qayda olaraq, Azərbaycanda siyasi fəaliyyətə görə həbslərin olmadığını bildirir və saxlanılan şəxslərin konkret hüquq pozuntularına görə cəzalandırıldığını vurğulayırlar.

Qeyd edək ki, müxalifətdə olan AXCP-nin hazırda 20-dən çox üzvü və fəalı uzunmüddətli həbs cəzası çəkir. Partiya bu şəxslərin müxtəlif ittihamlarla üzləşdiyini, lakin həbslərin siyasi sifariş əsasında həyata keçirildiyini bildirir. AXCP sədri Əli Kərimli də uzun müddətdir azadlıqdan məhrum edilmiş şəxslər sırasındadır.

Xatırladaq ki, 2025-ci il dekabrın 12-də AXCP üzvü Elbəyi Kərimli saxlanıldığı 2 saylı Cəzaçəkmə Müəssisəsinin tibb məntəqəsində vəfat edib. Partiya onun şərləndiyini və baş verənlərin özünəqəsd nəticəsində ölümə səbəb olduğunu iddia etsə də, rəsmi qurumlar ölüm faktının araşdırıldığını açıqlayıblar. Elbəyi Kərimli narkotik ittihamı ilə 5 il həbs cəzasına məhkum edilmişdi. AXCP isə onun 2023-cü ilin avqustunda keçmiş Prezident Heydər Əliyevin heykəlinə “Stalin” yazdıqdan sonra narkotik ittihamı ilə həbs edildiyini bildirirdi.

Mövzu ilə bağlı rəsmi qurumların mövqeyi açıqlanacağı təqdirdə, xəbər yenilənəcək.