Kiprdə Rusiyadan olan iki turisti öldürməkdə şübhəli bilinən Suriya vətəndaşı törətdiyi cinayəti etiraf edib. Bu barədə “Cyprus Mail” yazır.

Bundan əvvəl yerli media noyabrın ortalarında itkin düşmüş iki rusiyalı qadının meyitinin tapılması barədə məlumat yayıb. Hüquq-mühafizə orqanları qətlin 32 yaşlı suriyalı tərəfindən törədildiyini güman edib. Saxlanılan şəxs cinayəti etiraf edib və cəsədlərin harada basdırıldığını göstərib. Bu işdə onun iki tanışının da əli olub.
“Cyprus Mail”in məlumatına görə, şübhəli suriyalı on gün əvvəl həbs olunsa da, ancaq indi cinayətini etiraf edib. Kişi öldürülənlərin cəsədlərini evdən on metr aralıda çuxura basdırdığını, üstünü çınqılla örtüb basdırdığını deyib. Qeyd olunur ki, yağışlar səbəbindən polis dərhal o yeri tapa bilməyib.
Şübhəlinin sözlərinə görə, qətl ərəfəsində ova çıxıb. Səhər qayıdandan sonra suriyalı qadınların söhbətində onun adının çəkildiyini eşidib, bundan sonra onları güllələyib. Yerli polis rəisi Stelios Papateodoru bildirib ki, hücum edənin motivləri hələ də məlum deyil.