Amerika administrasiyası anti-Rusiya sanksiyalarının Moskva üçün mümkün qədər ağrılı olmasını və onların təsirinin Rusiyadan kənarda hiss olunmamasını təmin etməyə çalışır. Vaşinqton bu məhdudiyyətlərin uzunmüddətli təsirinə ümid edir.
Bunu jurnalistlər üçün keçirdiyi növbəti brifinqdə Dövlət Departamentinin mətbuat xidmətinin rəhbəri Ned Prays bildirib.

O, bəzi ABŞ rəsmilərinin Rusiya Federasiyasına qarşı məhdudlaşdırıcı tədbirlərin effektivliyinə artıq şübhə ilə yanaşdığı mediada yayılan xəbərləri şərh edərkən, "Biz hələ də strategiyamıza sadiq qalırıq" deyib.
Prays iddia etdiyi kimi, Amerikanın bu strategiyası “təkcə maliyyə sanksiyalarını deyil, həm də ixrac məhdudiyyətlərini - sənaye bazası, texnoloji bazası, müdafiə kompleksi, habelə digər kritik və strateji sektorları nəzərdə tutur”.