Bu gün Ermənistanın Eçmiədzin şəhərində yerləşən erməni kilsəsinin ali rəhbərliyinə qarşı gözlənilməz əməliyyat həyata keçirilib. Ermənistan Milli Təhlükəsizlik Xidmətinin (MTX) maskalı xüsusi təyinatlıları bütün ermənilərin katolikosu II Qareginin iqamətgahına daxil olublar.

Əməliyyat zamanı katolikos II Qaregin şəxsən hadisə yerinə çıxaraq təhlükəsizlik qüvvələrinin qarşısına keçib və vəziyyətin gərginləşməməsi üçün ruhanilərlə hər hansı toqquşmanın qarşısını almağa çalışıb. Eyni zamanda jurnalistlər ərazidən uzaqlaşdırılıb, hadisə yerində müşahidə aparmaq mümkün olmayıb.

Əməliyyatdan əvvəl Eçmiədzin şəhərinin polis rəisinin də kilsəyə gəldiyi bildirilir. Hazırda katolikos və təhlükəsizlik qüvvələri arasında müzakirələrin aparıldığı qeyd olunur.

Qeyd edək ki, bu insidentdən bir neçə saat əvvəl – bu gün səhər – 30-a yaxın maskalı şəxsin Şirak Yeparxiyasının inzibati binasına daxil olduğu bildirilib. Həmin hadisənin bu günkü əməliyyatla əlaqəli olub-olmadığı hələlik rəsmi şəkildə açıqlanmayıb.

Hadisə ilə bağlı Ermənistan rəsmi qurumlarından hələlik heç bir açıqlama verilməyib. Gözləntilər var ki, yaxın saatlarda məsələ ilə bağlı daha ətraflı məlumat yayılacaq.