İyunun 9-na keçən gecə Ukrayna Silahlı Qüvvələrinin Xüsusi Əməliyyat Qüvvələri və Müdafiə Qüvvələrinin digər bölmələri növbəti uğurlu əməliyyata imza atıblar. Ukrayna mənbələrinin verdiyi məlumata görə, birgə planlaşdırılmış əməliyyat çərçivəsində Rusiya Federasiyasının Nijni Novqorod vilayətində yerləşən Savasleyka hərbi aerodromu hədəfə alınıb.

Hücum zamanı Ukrayna hərbçiləri aerodromda yerləşən bir neçə Rusiya hərbi təyyarəsini – o cümlədən MiQ-31, Su-30 və Su-34 qırıcılarını məhv ediblər. Ukrayna Müdafiə Nazirliyi bildirib ki, hücum dəqiq zərbələrlə həyata keçirilib və aerodromda ciddi texniki itkilərə səbəb olub.

Hadisənin detalları hələlik tam açıqlanmasa da, Ukrayna tərəfi əməliyyatın uğurlu olduğunu və Rusiya Hərbi Hava Qüvvələrinin aviasiya potensialına zərbə vurulduğunu bəyan edib. Savasleyka aerodromu Rusiya üçün strateji əhəmiyyət daşıyan hərbi bazalardan biri hesab olunur.

Rusiya tərəfi hələlik rəsmi açıqlama verməyib. Sosial şəbəkələrdə yayılan məlumatlara əsasən, hücum zamanı aerodromda partlayış səsləri eşidilib və tüstü müşahidə olunub.

Bu hücum Ukrayna ordusunun son həftələrdə dərin arxa cəbhələrə yönəlmiş əməliyyatlarının bir hissəsi kimi qiymətləndirilir. Ekspertlər bu əməliyyatları Rusiya aviasiyasının Ukrayna səmasında fəaliyyətini məhdudlaşdırmaq məqsədilə həyata keçirilən taktik manevr kimi dəyərləndirirlər.