ABŞ Rusiyanın Kiyevə kütləvi hücumundan bir gün sonra – avqustun 29-da Ukraynaya 3350 ədəd uzunmənzilli ERAM raketinin satışını təsdiqləyib. Müqavilənin ümumi dəyəri 825 milyon dollar təşkil edir.

Avqustun 28-də Rusiya Kiyevə dron və ballistik raketlərlə genişmiqyaslı hücum həyata keçirib. Son məlumata görə, hücum nəticəsində 23 nəfər, o cümlədən 4 uşaq həlak olub, 52 nəfər isə yaralanıb. Bu, iyulun 31-dən bəri Ukrayna paytaxtına edilən ən böyük hücum hesab olunur.

Ukrayna prezidenti Volodimir Zelenski bildirib ki, bu zərbələr “həftələrlə və aylarla atəşkəs çağırışı edən dünya ictimaiyyətinə açıq cavabdır”.

Ağ evin mətbuat katibi Kerolayn Levitt isə açıqlamasında prezident Donald Trampın Rusiyanın hücumlarından məyus olduğunu, lakin buna təəccüblənmədiyini deyib:
“Bunlar çox uzun müddətdir müharibə şəraitində olan iki ölkədir”, – Levitt vurğulayıb.

Pentaqonun məlumatına görə, raketlərin və əlavə avadanlıqların maliyyələşdirilməsi Danimarka, Niderland və Norveçin vəsaitləri, həmçinin ABŞ-nin xarici hərbi maliyyələşdirməsi hesabına ödəniləcək. ABŞ Müdafiə Nazirliyi qeyd edib ki, bu silahlar Ukraynanın özünü müdafiə və regional təhlükəsizliyi təmin etmək imkanlarını gücləndirəcək.

ERAM raketlərinin uçuş məsafəsi 240–450 kilometr arasında dəyişir. Bu satış Tramp administrasiyasının Ukraynaya silah tədarükü ilə bağlı təsdiqlədiyi ilk böyük müqavilədir.

Xatırladaq ki, Donald Tramp prezidentliyə namizədliyi dövründə seçkilərdə qalib gəldiyi halda, 24 saat ərzində Rusiya-Ukrayna müharibəsini dayandıracağını vəd etmişdi. Lakin tərəflər arasında aparılan danışıqlar hələlik nəticəsiz qalıb.

Rusiya 2022-ci ilin fevralından etibarən Ukraynaya qarşı genişmiqyaslı hərbi əməliyyatlar həyata keçirir.