Rusiya ilə münaqişə olacağı təqdirdə Ukrayna məğlub olacaq. Bu fikri “Gazeta.pl” saytına müsahibəsində ABŞ-ın Avropadakı qüvvələrinin keçmiş komandanı, general Ben Hodces deyib.
O qeyd edib ki, Ukrayna üçün rusları geri çəkilməyə məcbur edəcək ciddi itkilər vermək böyük uğur olardı. Lakin general əmindir ki, hazırda Ukrayna buna qadir deyil.
"Ukrayna əsgərlərinin son illərdə böyük cəsarət, fədakarlıq və əzmkarlıq göstərməsinə baxmayaraq, hazır deyillər", - Hodces bildirib.
Generalın sözlərinə görə, Ukrayna hərbçiləri, "son illər böyük cəsarət və qətiyyət nümayiş etdirsələr də, uzun illərdir ki, Donbassda yalnız mövqe münaqişəsində iştirak etdikləri üçün səyyar müharibəyə hazırlaşmayıblar və hazır deyillər".
Qeyd olunub ki, son vaxtlar Qərb mətbuatı Moskvanın Kiyevə qarşı “hücum”a hazırlığı barədə yazılar dərc edir. Rusiya Xarici Kəşfiyyat Xidmətinin direktoru Sergey Narışkin bildirib ki, qonşu dövlətə heç bir müdaxilə planlaşdırılmayıb. O, bu cür xəbərləri ABŞ-ın pis niyyətli təbliğatı kimi qiymətləndirib. Prezidentin mətbuat katibi Dmitri Peskovun sözlərinə görə, Rusiyanın aqressiv niyyəti yoxdur və qoşunların ölkə daxilində hərəkəti heç kimi narahat etməməlidir.