ABŞ-nin Belarusla bağlı bəzi sanksiyaları ləğv etməyə razılaşmasından sonra ölkədə siyasi motivlərlə həbs olunduğu bildirilən daha 123 nəfər azadlığa buraxılıb.

Azad edilənlər arasında tanınmış müxalif fəal Mariya Koleşnikova və Nobel Sülh Mükafatı laureatı Ales Bialiatski də var.

Bu addım ABŞ prezidenti Donald Trampın Belarus üzrə xüsusi elçisi Con Koalın Minskdə hökumət rəsmiləri ilə apardığı danışıqlardan sonra atılıb.

Razılaşmaya əsasən, ABŞ Belarusun əsas ixrac məhsullarından biri olan və gübrə istehsalında mühüm rol oynayan potaş üzərindən tətbiq edilən sanksiyaları ləğv etməyə razılaşıb.

“İki ölkə arasındakı münasibətlər normallaşdıqca, daha çox sanksiya aradan qaldırıla bilər”, – deyə Koal jurnalistlərə bildirib.

Məlumata görə, azad edilən şəxslər avtobusla birbaşa Litvanın paytaxtı Vilnüsə göndəriləcək.

Koleşnikova və digər müxalif fəallar beş il əvvəl keçirilən prezident seçkilərindən sonra baş verən etirazlar zamanı həbs olunmuşdular. ABŞ və Avropa İttifaqı prezident Aleksandr Lukaşenkonun qalib elan edildiyi həmin seçkilərin nəticələrini tanımayıb.

Xatırladaq ki, iyun ayında ABŞ xüsusi elçisinin əvvəlki səfəri zamanı 14 “siyasi məhbus” əfv edilərək azadlığa buraxılmışdı. Onların arasında mühacirətdə olan müxalifət lideri Svetlana Tixanovskayanın həyat yoldaşı Sergey Tixanovski də var idi. Sentyabr ayında isə daha 52 nəfər azad edilib.

Bununla belə, hüquq müdafiəçilərinin bildirdiyinə görə, Belarusda hazırda mindən çox siyasi məhbus hələ də həbsdə qalır.