İran parlamentinin Milli Təhlükəsizlik Komitəsinin rəhbəri İbrahim Əzizi Ukraynanın İsrailə dronlarla dəstək verdiyini iddia edərək, bu ölkənin müharibəyə cəlb olunduğunu bildirib.

O, sosial media hesabında yazıb ki, bu halda Ukrayna ərazisi İran üçün qanuni hərbi hədəfə çevrilə bilər.

“İsraili dronlarla dəstəkləməklə, uğursuz Ukrayna faktiki olaraq müharibəyə cəlb olunub və BMT Nizamnaməsinin 51-ci maddəsinə uyğun olaraq bütün ərazisini İran üçün qanuni hədəfə çevirib”, – deyə Əzizi qeyd edib.

Bundan əvvəl Ukrayna prezidenti Volodimir Zelenski The New York Times qəzetinə müsahibəsində bildirib ki, ABŞ-nin müraciətindən sonra Ukrayna dron mütəxəssislərindən ibarət komandanı göndərib.

Lakin ABŞ prezidenti Donald Tramp bu məlumatı təkzib edib. O bildirib ki, ABŞ-nin Yaxın Şərqdə dronlarla mübarizə aparmaq üçün Ukraynanın köməyinə ehtiyacı yoxdur.