Ukrayna silahlı qüvvələrinin məlumatına görə, 3 sentyabr gecəsi Rusiya ölkəyə yüzlərlə dron və onlarla raketlə genişmiqyaslı hava zərbələri endirib. Hücumlar nəticəsində Ukraynanın qərb bölgələri, həmçinin Kirovoqrad, Kiyev və Çerniqov vilayətləri zərbə altında qalıb. Hədəflər arasında yaşayış evləri, enerji obyektləri və dəmir yolu infrastrukturu olub.

526 hava hücum vasitəsi aşkarlanıb.

Ukrayna Hərbi Hava Qüvvələrinin açıqlamasına görə, ümumilikdə 526 hava hücum vasitəsi qeydə alınıb. Onların arasında:
• 502 ədəd “Shahed” tipli kamikadze dronu,
• 1 pilotsuz imitasiya aparatı,
• 16 “Kalibr” qanadlı raketi (Qara dənizdən buraxılıb),
• 8 X-101 raketi (Saratov vilayəti və Krasnodar diyarından buraxılıb).

Ukrayna ordusu 451 hədəfi vuraraq zərərsizləşdirdiyini açıqlayıb. Onların içində 430 dron, 14 “Kalibr” və 7 X-101 raketi olub. Bununla belə, 3 raket və 69 dron hədəfə dəyib, bəzi bölgələrdə qalıqların düşməsi nəticəsində dağıntılar qeydə alınıb.

Kirovoqrad vilayətində dağıntılar

Kirovoqrad vilayətinin Znamyanka şəhərində Rusiya zərbələri nəticəsində 28 yaşayış evi zədələnib, onlardan biri tamamilə dağılıb. Beş nəfərin yaralandığı bildirilir. Vilayətin dəmir yolu infrastrukturu da zərər görüb.

Hadisə nəticəsində bir neçə bölgədə yanğınlar başlayıb, hazırda Dövlət Fövqəladə Hallar Xidməti onların söndürülməsi ilə məşğuldur.

Ukrayna hakimiyyəti hücumları mülki əhaliyə qarşı “terror aktı” adlandırıb.