Rusiya Belarusdan aviasiya yanacağı idxalını kəskin şəkildə artırıb.

Məlumata görə, 2026-cı ilin may ayında Rusiya Belarusdan 5,17 min ton aviasiya kerosini idxal edib. Bu, ötən ilin eyni dövrü ilə müqayisədə təxminən dörd dəfə çoxdur.

İyunun ilk on günündə isə Rusiyanın Belarusdan aldığı aviasiya yanacağının həcmi 2,6 min tona çatıb.

Bildirilir ki, idxalın artması Rusiyada aviasiya yanacağı istehsalının azalması ilə bağlıdır. Rusiya hakimiyyəti ölkədə nə qədər aviasiya yanacağı istehsal olunduğunu rəsmi açıqlamır.

Yanacaq bazarındakı vəziyyətə Moskva neft emalı zavodunun fəaliyyətinin dayanması da təsir edib. Kapotnyada yerləşən zavod iyunun ortalarında pilotsuz uçuş aparatlarının hücumundan sonra işini dayandırıb. Məlumatlara görə, müəssisənin ən azı qışa qədər tam fəaliyyətini bərpa etməyəcəyi gözlənilir.

İyunun 1-dən Rusiya tarixində ilk dəfə aviasiya kerosininin ixracına qadağa qoyub. Bu məhdudiyyətin noyabrın 30-dək qüvvədə qalacağı bildirilir.

Bundan başqa, iyunun ortalarından etibarən Rusiyanın bəzi hava limanlarında təyyarələrin yanacaqla təmin olunması ilə bağlı məhdudiyyətlər barədə xəbərdarlıqlar edilməyə başlanıb.

Rusiyada avtomobil yanacağı bazarında da problemlər yaşanır. Məlumata görə, ölkənin 30-dan çox regionunda benzinin satışına məhdudiyyətlər tətbiq olunub.

Yanacaq çatışmazlığının əsas səbəblərindən biri Ukraynanın Rusiya neft emalı zavodlarına və işğal altındakı ərazilərdə logistika xətlərinə endirdiyi zərbələr hesab olunur.

Rusiya mediasının məlumatına görə, benzin istehsalı iyunun sonuna doğru illik müqayisədə 25 faiz azalıb. Moskvanın Qazaxıstandan 50 min ton benzin almaq istədiyi də bildirilir.