Polşanın xarici işlər naziri Radoslav Sikorski Rusiyanın NATO ölkələrindən birinə qarşı “saxta bayraq” əməliyyatı hazırlaya biləcəyini bildirib.

Onun sözlərinə görə, Moskva belə addımlardan Qərbə təzyiq göstərmək və Ukraynaya dəstəyi zəiflətmək üçün istifadə edə bilər.

Sikorski qeyd edib ki, Rusiya Prezidenti Vladimir Putinin son bəyanatları ciddi qəbul edilməlidir. Polşalı nazirin fikrincə, Putin illər ərzində Ukraynanı “süni dövlət” adlandırıb və bu cür açıqlamalar sonradan real hərbi addımlarla müşayiət olunub.

“Bunu saxta bayraq əməliyyatına hazırlıq kimi qəbul edirəm. Ruslar bu üsuldan tez-tez istifadə edirlər. Bu, onların hərbi yanaşmasının bir hissəsidir”, — deyə Sikorski bildirib.

Polşa XİN rəhbəri eyni zamanda vurğulayıb ki, NATO ölkələri Rusiyaya qarşı hücum planlaşdırmır. Onun sözlərinə görə, mümkün təxribatın qarşısını almağın ən yaxşı yolu Moskvanın planlarının Qərbə məlum olduğunu açıq şəkildə göstərməkdir.

Sikorskinin açıqlaması Baltik ölkələrinin kəşfiyyat orqanlarının xəbərdarlıqları fonunda səslənib. Latviya kəşfiyyatı Rusiyanın Baltik ölkələri və ya Polşaya qarşı hərbi xarakterli hibrid təxribatlar hazırlaya biləcəyini istisna etmir.

Söhbət genişmiqyaslı hərbi hücumdan deyil, dron insidentləri, raket hadisələri, sabotaj və digər hibrid əməliyyatlardan gedir. Bu cür addımların məqsədinin NATO-nun birliyini və reaksiyasını yoxlamaq, eləcə də Avropa ölkələrinə Ukraynaya dəstəyi azaltmaq mesajı vermək ola biləcəyi bildirilir.

Ekspertlər hesab edirlər ki, Rusiya hazırda ikinci cəbhə açmaq imkanında olmasa da, Avropada gərginliyi artırmaq üçün hibrid təzyiq vasitələrindən istifadə edə bilər.

Son illərdə Polşa və digər NATO ölkələri Rusiya ilə əlaqələndirilən sabotaj, kiberhücum, casusluq və logistika obyektlərinə qarşı təxribat cəhdləri barədə dəfələrlə məlumat yayıblar.