Foto.info.az xəbər agentliyi AzərTAca istinadla xəbər verir ki, Hindistanda orta əsrlər məqbərəsi Tac-Mahalın “Dünyanın yeddi yeni möcüzəsi” siyahısına daxil edilib.

“Dünyanın yeddi yeni möcüzəsi” seçimlərini bəşəriyyətin memarlıq irsinin qorunub saxlanması uğrunda mübarizə aparan eyniadlı İsveçrə fondu elan etmişdir. Dünyanın ənənəvi möcüzələrindən bizim günlərədək yalnız Cizzədəki Misir ehramları qaldığına görə, altı əlavə möcüzəni müəyyənləşdirmək üçün ümumdünya seçimlərinin keçirilməsi qərara alınmışdır.

İlyarım əvvəl xüsusi komissiya 77 namizəddən 21-ni seçmişdir. Siyahıya Kreml və Qızıl meydan, Stoun-Henc, Eyfel qülləsi, Böyük Çin səddi, Roma Kolizeyi, Nyu-Yorkdakı Azadlıq heykəli, Mayya hindilərinin ehramları düşmüşdür.
Abidələrin taleyini elektron səsvermə həll edəcək və onun yekunları iyulun 7-də təntənəli surətdə təqdim olunacaqdır.

Tac-Mahalı 17-ci əsrdə Böyük Moğollar sülaləsinin beşinci hökmdarı Şah Cahan doğuş zamanı vəfat edən sevimli zövcəsi üçün tikdirmişdir. Ağ mərmərdən olan nəhəng tikilinin inşasına dövrün görkəmli heykəltəraşları, memarları və mühəndisləri cəlb edilmişdi. Məqbərə Aqrada, Hindistanın paytaxtı Nyu-Dehlidən 200 kilometr cənubda yerləşir. Məqbərə təkcə Şah Cahanın öz zövcəsinə sonsuz məhəbbətinin deyil, həm də Hindistanın rəmzi olmuşdur.