Bakıya qar yağanda sakinlər öncə sevincini sonra isə şəhər təsərrüfatının qişa hazır olmamasının məyusluğunu yaşayırlar. Dünən sosial şəbəkələrdə çoxlu qar görüntüləri, bu gün isə qar yağmasından qaynaqlanan problemlərdən bəhs edən fotolar dərc olunub. Bakı şəhərinin relyefi qarlı havada yolların buzlaması səbəbindən hərəkət üçün çox təhlükəlidir. Bunun qarşısını öncədən alınması üçün avtomobil və piyada yolları təmizlənməli, asfalt və piyada keçidləri sürüşmə ehtimalını azaldan qumlarla örtülməlidir. Bu işi isə əl əməyi ilə deyil, maşınlarla görmək lazımdır. Amma Bakıda əksəriyyəti yaşlı qadınlardan ibarət olan təmizləyicilər qrupunun əsas texniki vasitəsi xəkəndaz hesab olunur.
Yaxınlardan aldığım məlumata görə şəhərin bir çox yaşayış məntəqələrində hələ su donmadan öncə mərkəzləşdirilmiş istilik sistemi sıradan çıxıb, bəzi yerlərdə su, enerji, qaz təchizarı dayanıb, dəm qazından boğulma və zəhərlənmə halları, primitiv istilik cihazlarından istifadəyə görə yanğınlar, qaz təhlükəsizliyinə riayət edilmədiyindən partlayışlar artıb, nəqliyyatın hərəkətində tıxaclar yaranıb, çox saylı qəzalar qeydə alınıb, amma təəssüflər olsun ki, bütün bu problemlərin mövcudluğu şəraitində Nazirlər Kabineti və ya Bakı şəhər icra hakimiyyəti qışa hazırlıq məsələlərini müzakirə etmək əvəzində isti kabinetlərində qar mənzərələrini seyr edir, prezident isə Azərbaycanda idmanın inkişafında xidmətləri olan idmançıların və mükafatlandırılması mərasimini keçirir.

Bu ölkədə çox şey öz axarına buraxılıb, Allah axırını xeyir eləsin, xətadan, bəladan uzaq etsin, bu soyuqda və çovğunda vətənin keşiyini çəkənlərə yar olsun, əsgərləri qorusun!