09 dekabr 2022-ci il tarixdən etibarən qurama ittihamlarla həbsdə olan ictimai fəal Bəxtiyar Hacıyevin müdafiçiləri girov qətimkan tədbirinin seçilməsi ilə bağlı Xətai Rayon Məhkəməsinə müraciət ediblər.

Sabah saat 16-30-da Xətai Rayon Məhkəməsinin hakimi Sülhanə Hacıyeva müdafi tərəfinin vəsatətinə baxacaq.
Məlumat üçün qeyd edirəm ki, girov qismində qətimkan tədbiri ittiham olunan şəxsin həbsdən azad edilməsi, lakin onun cinayət prosesini həyata keçirən orqanın sərəncamında qalmasını təmin etmək məqsədi ilə məhkəmə tərəfindən müəyyən edilmiş pul məbləğini və s. dövlət bankında məhkəmənin depozitinə qoymaqdan ibarətdir.

İttiham tərəfi əsassız olaraq ictimai fəal Bəxtiyar Hacıyevi az ağır cinayət törətməkdə təqsirləndirdiyindən, Cinayət Prosessual Məcəlləsinin 164.5.2-ci maddəsinin tələbinə görə girov on min manatdan az ola bilməz.

23 ildir ki, qüvvədə olan Cinayət Prosessual Məcəlləsinin sözügedən norması “ölü”dür. Təcrübədə yalnız bir dəfə Nəsimi Rayon Məhkəməsi tərəfindən girov qətimkan tədbiri tətbiq edilib ki, o da apellyasiya instansiyasında ləğv olunub.