Qubad İbadoğluya azadlıq!

Milli Şura onun həbsi ilə əlaqədar bəyanat yayıb: İyul ayının 23-də ADR partiyasının lideri, London İqtisadiyyat və Siyasət Məktəbinin professoru, iqtisadçı alim, tanınmış ziyalı Qubad İbadoğluna qarşı dövlət səviyyəsində zorakılıq aktı baş verib.

Qubad İbadoğlu xanımı ilə birlikdə DİN Baş Mütəşəkkil Cinayətkarlıqla Mübarizə İdarəsinin əməkdaşları tərəfindən zorakılıqla saxlanılıb, bu zaman ona və xanımına qarşı fiziki güc və mənəvi işgəncə tətbiq edilib, hər ikisinə bədən xəsarətləri yetirilib. Hipertoniya və şəkərli diabet xəstəsi olan Qubad İbadoğluna saxlanılandan sonra dərmanları verilməyib.

Qubad İbadoğlu saxlanmasından az sonra DİN-in mətbuat xidməti onun Türkiyə hüquq-mühafizə orqanlarından daxil olan məlumat əsasında Fətullah Gülən şəbəkəsinin üzvü kimi saxlanılan dörd Azərbaycan vətəndaşının birinin ifadəsi əsasında şahid qismində istintaqa cəlb edilməsi barədə məlumat yaydı. Vəkilin bildirdiyinə görə, Qubad bəy onun əleyhinə ifadə vermiş həmin şəxsi tanımır.

Burada məqsəd, heç şübhəsiz ki, Türkiyə xidmət orqanlarından qaynaqlanması təəssüratı yaratmaqla, Azərbaycan ictimai fikrində həbsin səbəblərinə mənəvi etibarlılıq qazandırmaqdır.
Ölkənin ən işıqlı ziyalılarından, ictimai-siyasi xadimlərindən biri olan Qubad Ibadoğlu dünyada tanınmış alimdir, London İqtisadiyyat və Siyasət Məktəbinin dəvətli professorudur, uzun müddət ABŞ-ın dünyaca tanınmış Duke Universitetində və Nyu Cersidə yerləşən Ratqers Universitetlərində dərs deyib, qiymətli təcrübə qazanıb. Qubad bəy iqtisadiyyat üzrə ən nüfuzlu beynəlxalq tədbirlərdə ölkəni təmsil edib.

Qubad bəyin "Bandotdel" işçiləri tərəfindən zorakı yolla saxlanılması hüquq adına rəzalətdir. İyul ayının 24-də saxta ittihamla Nərimanov rayon məhkəməsində Qubad bəy haqqında Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə 3 ay 26 gün müddətinə həbs qətimkan tədbiri seçib. Dünyanın birinci iqtisadiyyat məktəbində gənclərə halal pul qazanmağın yollarını öyrədən iqtisadçı professor saxta pul və ya qiymətli kağızlar hazırlamaqda, satmaqda şübhəli bilinir. Görünür, hüquq-mühafizə orqanları Qubad bəyi saxlamaq üçün dəlilsizlik sindromu ilə qarşılaşıblar və nəticədə ölkənin iqtisadiyyat üzrə ən nüfuzlu aliminə qarşı bu qədər ucuz, gülünc, hüquqi anlayışa sığmayan ittiham irəli sürüblər. Müstəqilliyi olmayan məhkəmə isə belə cəfəng iddia üzrə 4 aylıq həbs qətimkanı seçib.

Qubad bəy 3 həftədir Bakıya gəlib. Onun 3 həftə ərzində mütəşəkkil cinayətkar dəstə yaradıb saxta dollar istehsalatını işə salması və kəsdiyi saxta pulun 40 minini də ofisdə saxlamasını iddia etmək absurddur. Qubad bəyin ailə üzvləri ofisə müdaxilə olduğunu və yarıya qədər saxta əskinaslardan ibarət olan 40 min dolların öncədən ofisdə yerləşdirildiyini bildirirlər.

Ölkənin tanınmış iqtisadçısına, nüfuzlu ziyalısına, partiya liderinə qarşı belə natəmiz əməllərdən istifadə edilməsi sözün tam mənasında biabırçılıqdır. Milli Şura bu qanunsuzluqlara və zorakılıq aktına öz etirazını bildirir.
Qubad bəyin həbsi, ilk növbədə, onun Azərbaycan hökumətinin yeritdiyi siyasi, iqtisadi və sosial siyasətinə tənqidi münasibəti ilə bağlıdır. Qubad İbadoğlu Əliyev rejiminin korrupsiya əməllərini fakt və dəlillərlə ifşa edən görkəmli alimdir, dünya tərəfindən etibar qazanmış təhlilçidir.

Qubad bəy ilk gündən "sülhməramlı" adı ilə rus qoşunlarının Azərbaycana qaytarılmasına qarşı mövqe ortaya qoyub, Qarabağın azad olunmuş ərazilərində həyata keçirilən sosial və infrastruktur layihələrində korrupsiya faktlarının olduğunu üzə çıxarıb. Onun müəllifi olduğu "BİZ.tv" ardıcıl olaraq tənqidi mövqeyi ilə seçilib.

DİN-in hansı əməliyyat keçirməsindən, harada saxta dollar yerləşdirməsindən, məhkəmənin hansı qərar qəbul etməsindən asılı olmayaraq, Qubad bəy onun həbsinin hakimiyyətin siyasi sifarişi əsasında həyata keçirildiyini bildirdi.

Şübhəsiz ki, baş verənlər Qubad bəyin müxalif siyasi mövqeyi və "BİZ.tv"dəki tənqidi çıxışları ilə bağlıdır.

Yeni yaradılmış və Londonda qeydiyyatdan keçirilmiş "Azərbaycan Gənclərinin Təhsil Fondu"nun da hakimiyyəti qəzəbləndirdiyi şübhəsizdir. Son həftələr ərzində Milli Məclisin 5 deputatı (Tahir Kərimli, Aydın Mirzəzadə, Elşən Musayev, Ceyhun Məmmədov, Fəazil Ağamalı) hakimiyyət və YAP mətbuatında bu Fonda və onun təsisçilərinə qarşı böhtan kampaniyası aparıb, Fonda qarşı tədbirlər görülməsi ilə bağlı hakimiyyət orqanlarına çağırış edilib.

Biz Milli Şura olaraq Qubad bəyə qarşı baş verənlər zorakılıq və qanunsuzluğa, onun siyasi sifariş əsasında həyata keçirilən həbsinə etirazımızı bildirir, ona qarşı saxta və qurama ittihamları qınayır, professor Qubad İbadoğlunun bilavasitə siyasi və tənqidçi fəaliyyətinə görə saxlandığını bəyan edir, onun dərhal azad olunmasını tələb edirik.

Milli Şura