32 gündür aclıq edən Fazil Qasımov həbsinə səbəb olan amillərlə bağlı açıqlama yayıb.

1 saylı Bakı İstintaq Təcridxanasında 32 gündür aclıq edən İstanbul Universitetinin doktorantı Fazil Qasımovun qaradaşına milli qəhrəman, şəhid general-mayor Polad Həşimovun anası Səmayə Həşimovanın zəng edərək aclığı dayandırmasını xahiş etdiyini bildirib. Lakin Fazil Qasımov aclığı sonadək davam etdirəcəyini bəyan edib.

Bu barədə Fazil Qasımovun müraciətində deyilir.

“Əziz Səmayə ana! Məni bağışlayın. Bu siyasi motivli cinayət işinə xitam verilmədən, haqq-ədalət yerini tutmadan aclığı dayandıra bilmərəm. Sizin oğlunuz da haq-ədalət uğrunda şəhid olub”, o qeyd edib.

Fazil Qasımov əksinə Səmayə Həşimovadan xahiş edir ki, şəhid anaları adından Türkiyə Prezidentinə müraciət edib onun həbsdən azad edilməsinə kömək etməsini xahiş etsin.

“Mən Türkiyə dövlətinə güvənərək 2020-ci il mayın 4-də uğradığım sui qəsd cəhdindən sonra üçüncü dövlətə mühacirət etmədim. İnanıram ki, Sizin müraciətinizdən sonra Türkiyə Prezidenti mənə kömək edib həyatımı xilas edəcək”, Qasımov qeyd edir.

Bununla yanaşı, Səmayə Həşimova Fazil Qasımovun aclığı dayandırması xahişi ilə çıxış etdiyi barədə hər hansı açıqlama verməyib.

Qasımov müraciətində onun həbsi üçün Azərbaycanın hüquq mühfizə oqranlarının, hökumət üzvlərinin Türkiyə rəsmiləri və BMT-nin Cernevrə ofisinin rəsmiləri ilə apardığı danışıqlardan bəhs edir.

Fazil Qasımov istintaq zamanı, o cümlədən iqtisad elmləri doktoru Qubad İbadoğlu ilə üzləşmə zamanı çayına psixotrop maddə qatıladığını və bu vasitə ilə İbadoğluna qarşı ifadə verdiyini bildirir.

Onun müraciətində həmçinin Azərbaycan Dövlət Neft Şirkətinin keçmiş rəhbərinin FETO ilə əməkaşlığı və bu qismdə pul köçürmələri barədə iddialar yer alır.

Fazil Qasımov həmçinin Palmalı şirkətinin təsisçisi Mübariz Mənsimovun biznes əlaəqlərindən, onun Rusiya Vergilər Departamenti tərəfindən cərimələnməsindən və Rusiya hökumətində hazırda yüksək vəzifə tutan şəxsinin böyük həcmdə rüşvət müqabilində cərimənin ləğv edilməsi təklifi ilə bağlı iddialarını yazıb.

Fazil Qasımov Qafqaz Universitetini bitirib (2017-ci il yanvarın 16-da fəaliyyətini dayandırıb), sonra Türkiyədə oxuyub, daha sonra İstanbul Universitetinin doktoranturasını bitirib.

Türkiyədə yaşayan iqtisadçı alim Qasımov 2023-cü il avqustun 8-də İstanbulda tutularaq Azərbaycana gətirilib. Fazil Qasımov Qubad İbadoğluna qarşı qaldırılmış cinayət işinin istintaqı çərçivəsində saxlanılıb və Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə) maddəsi ilə ittiham olunur.

O, Qubad İbadoğlu ilə ünsiyyətinin 2020-ci ilin mart ayında virtual formada yarandığını bildirib.

“Təhsil Fondu (AYEF) Böyük Britaniyanın Xeyriyyə Komissiyası tərəfindən qeydiyyata alındıqdan 23 gün sonra Qubad İbadoğlu, 39 gün sonra mən həbs edildim”, o əlavə edib.

Azərbaycan Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə), 167-3.1-ci (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunan Qubad İbadoğlu ötən ilin iyulunda həbs edilib və bu il aprelin 22-nə qədər həbsdə qalıb.

Çoxsaylı yerli və beynəlxalq çağırışlardan sonra aprelin 22-də İbadoğlunun həbsi ev dustaqlığı tədbiri ilə əvəz edilib.

Mayın 21-də isə ev dustaqlığı müstəntiqin qərarı ilə polisin nəzarətinə verilmə ilə əvəz olunub və iş üzrə istintaqın müddəti daha 3 ay (avqustun 20-dək) uzadılıb.

İbadoğlu ona qarşı ittihamların əsassız və siyasi olduğunu, fəaliyyətinə görə cəzalandırıldığını qeyd edir.