Ali Məhkəmənin Plenumunun 24 dekabr 2025-ci il tarixli “Şəxsiyyət hüquqlarının müdafiəsi” haqqında qərarının qəbul edilməsi ilə 1999-cu il 14 may tarixli “Şərəf və ləyaqətin müdafiəsi barədə qanunvericiliyin məhkəmələr tərəfindən tətbiq edilməsi təcrübəsi haqqında” plenum qərarı qüvvədən düşüb. Bu barədə məhkəmədən məlumat verilib.

Yeni qərarla şərəf, ləyaqət və işgüzar nüfuz anlayışları bir-birindən və şəxsi toxunulmazlıq hüququndan ayrılaraq ayrıca hüquqi məzmunla müəyyən edilib. Qərarda həmçinin publik şəxslər anlayışı ilk dəfə ayrıca kateqoriya kimi təsbit olunub və onların fəaliyyəti ilə bağlı tənqidlərə daha geniş dözümlülük göstərilməli olduğu vurğulanıb.

Plenum qərarında yayılma anlayışına yeni izah verilib, media subyektlərinin məsuliyyəti, xüsusən audio-video yazılar və canlı yayımlar zamanı hüquqi yanaşma dəqiqləşdirilib. Eyni zamanda, hüquqi və fiziki şəxslərin mənəvi zərər, təkzib, cavab vermə və digər müdafiə vasitələrindən istifadə imkanları geniş izah olunub.

Qərarla fiziki şəxslərin üzr istəməyə məcbur edilməsinin yolverilməz olduğu vurğulanıb, bunun insan ləyaqətini alçaldan rəftar hesab edildiyi bildirilib. Yalnız qanunla nəzərdə tutulan istisna hallarda üzr istənilməsi mümkün sayılıb.

Qeyd edilib ki, yeni plenum qərarı məhkəmə təcrübəsində şəxsiyyət hüquqlarının daha dəqiq və vahid tətbiqini təmin etməyə xidmət edir.