Tarix və mədəniyyət abidələrini qəsdən məhv etmə və ya korlama ilə bağlı cinayət məsuliyyəti ağırlaşdırılıb. Bununla bağlı Prezident İlham Əliyev Cinayət Məcəlləsinə edilən dəyişikliklərin tətbiqi barədə Fərman imzalayıb.

Dəyişikliklərə əsasən, dövlət tərəfindən mühafizə olunan mədəni sərvətlərə vurulan ziyana görə cəzalar daha sərt və mərhələli şəkildə müəyyən edilib. İndiyədək qüvvədə olan qanunvericiliyə əsasən, dövlət tərəfindən qorunan tarix və mədəniyyət abidələrini qəsdən məhv etmə və ya korlama iki min manatdan dörd min manatadək cərimə və ya iki ilədək müddətə azadlıqdan məhrum etmə ilə cəzalandırılırdı.

Yeni dəyişikliklərə görə isə dövlət tərəfindən qorunan daşınar və ya daşınmaz mədəni sərvətləri qəsdən korlama xeyli miqdarda ziyan vurmaqla törədildikdə, cinayət nəticəsində vurulmuş ziyanın iki mislinədək miqdarda cərimə, iki ilədək müddətə azadlığın məhdudlaşdırılması və ya eyni müddətə azadlıqdan məhrum etmə nəzərdə tutulur.

Dövlət tərəfindən qorunan daşınar mədəni sərvətlərin qəsdən məhv edilməsi halında isə təqsirli şəxs vurulmuş ziyanın iki mislindən üç mislinədək miqdarda cərimə, üç ilədək müddətə azadlığın məhdudlaşdırılması və ya eyni müddətə azadlıqdan məhrum etmə ilə cəzalandırılacaq.

Daha ağır sanksiyalar dövlət tərəfindən qorunan daşınmaz mədəni sərvətlərin qəsdən məhv edilməsinə görə tətbiq olunacaq. Bu halda cinayət nəticəsində vurulmuş ziyanın üç mislindən beş mislinədək miqdarda cərimə, yaxud üç ildən beş ilədək müddətə azadlığın məhdudlaşdırılması və ya eyni müddətə azadlıqdan məhrum etmə cəzası nəzərdə tutulur.

Qanunvericiliyə edilən dəyişikliklərə əsasən, göstərilən əməllər təkrar törədildikdə və ya digər ağırlaşdırıcı hallarda məsuliyyət daha da sərtləşdiriləcək.

Qeyd edək ki, bu dəyişikliklər mədəni irsin qorunmasının gücləndirilməsi, tarix və mədəniyyət abidələrinə qarşı qanunsuz əməllərin qarşısının alınması məqsədi daşıyır.