8 avqustda imzalanan Vaşinqton Bəyannaməsindən və Azərbaycanın sülh istiqamətində atdığı real addımlardan sonra Ermənistanın xarici siyasət kursunda nəzərəçarpacaq dəyişiklik müşahidə olunur. Bu dəyişikliklər Avropa Şurası Parlament Assambleyasının (AŞPA) sessiyasında Ermənistanın xarici işlər naziri Ararat Mirzoyanın çıxışında da açıq şəkildə öz əksini tapıb.

Mirzoyan bildirib ki, Cənubi Qafqazda davamlı təhlükəsizlik və sabitlik yalnız region ölkələrinin birbaşa dialoqu əsasında mümkündür. Onun sözlərinə görə, Ermənistanın inkişafı, iqtisadi inteqrasiyası və xarici asılılıqlardan xilas olması Azərbaycan və Türkiyə ilə əməkdaşlıqdan keçir və bu proses kənar müdaxilə olmadan həyata keçirilməlidir.

Nazirin çıxışı göstərir ki, rəsmi İrəvan uzun illər davam edən yanlış xarici siyasət xəttinin dalana dirəndiyini anlayır və regional reallıqlara uyğun daha praqmatik mövqeyə keçməyə çalışır. Ermənistan hökuməti Azərbaycanla sülhü və iqtisadi əməkdaşlığı artıq siyasi seçim deyil, dövlətin gələcəyi üçün zəruri şərt kimi qəbul edir.

Bu kontekstdə Mirzoyanın Zəngəzur dəhlizi ilə bağlı açıqlamaları da diqqət çəkib. Ermənistan XİN rəhbəri layihəni təkcə nəqliyyat marşrutu deyil, həm də iki ölkə arasında sülh və əməkdaşlığın real mexanizmi kimi qiymətləndirib.

Ekspertlərin fikrincə, Paşinyan hökumətinin mövqeyi Ermənistanın mərhələli şəkildə köhnə, iflasa uğramış xarici siyasət kursundan uzaqlaşdığını və regionda formalaşan yeni reallıqları qəbul etdiyini göstərir.