Avropa Parlamenti Azərbaycanda bütün siyasi məhbusların azad edilməsini və bu ölkədən qaz alışının dayandırılmasını tələb edib

Cümə axşamı Avropa Parlamenti qəbul etdiyi qətnamədə Azərbaycanda insan hüquqlarının kobud şəkildə pozulmasını pisləyib. Sənəddə fəallara, jurnalistlərə və müxalifət liderlərinə qarşı repressiyalardan danışılır. Deputatlar bildiriblər ki, bu sui-istifadə halları COP29-un Bakıda keçirilməsilə bir araya sığmır. Avropa Parlamentinin üzvləri Avropa İttifaqını Bakıdan qaz asılılığına son qoymağa çağırıblar.


Deputatlar rejimin fəallara, jurnalistlərə, müxalifət liderlərinə və Avropa İttifaqı vətəndaşlarına qarşı repressiyalarını qətiyyətlə pisləyirlər. Belə ki, COP29 ərəfəsində bu repressiyalar artıb.

Avropa Parlamenti bildirir ki, Azərbaycanda insan hüquqlarının pozulmasının davam etməsi orada iqlim konfransının keçirilməsilə bir araya sığmır və Avropa İttifaqı liderlərini, o cümlədən Avropa Komissiyasının sədri Ursula fon der Lyayeni Azərbaycanın bu sahədəki pis reputasiyanın müzakirə etmək üçün görüşdən istifadə etməyə çağırır.

Parlament həmçinin Bakını Azərbaycanda və onun hüdudlarından kənarda repressiyaların bütün formalarına son qoymağa, özbaşına saxlanılan şəxsləri azad etməyə və bütün siyasi motivli ittihamları aradan qaldırmağa çağırır.

Avropanın Azərbaycandan qaz asılılığı dayandırılmalıdır

Azərbaycandan Avropa İttifaqına qaz idxalının artmasının Rusiya qazının Bakıya idxalı ilə kompensasiya oluna biləcəyilə bağlı narahatlığa istinad edən Avropa Parlamenti Avropa İttifaqının Azərbaycandan qaz ixracından asılılığına son qoymağa çağırıb.

Deputatlar həmçinin Avropa Komissiyasından Avropa İttifaqı və Azərbaycan arasında energetika sahəsində strateji tərəfdaşlıq haqqında 2022-ci il tarixli qarşılıqlı anlaşma memorandumunun dayandırılmasını xahiş edirlər.

Bundan əlavə, qətnamədə deyilir ki, Avropa İttifaqı və Azərbaycan arasında tərəfdaşlıq haqqında istənilən gələcək saziş siyasi məhbusların azad edilməsi, hüquqi islahatların aparılması, ölkədə insan hüquqları ilə bağlı ümumi vəziyyətin yaxşılaşdırılması, həmçinin Bakının Ermənistanla sülh danışıqlarında iştiraka hazır olduğunu nümayiş etdirməsilə şərtləndirilməlidir.

Azərbaycan qoşunlarını Ermənistanın suveren ərazisindən çıxarmalıdır

Avropa Parlamentinin deputatları həm Azərbaycanın, həm də Ermənistanın suverenliyinə və ərazi bütövlüyünə öz dəstəyini təsdiqləyərək iki ölkə arasında münasibətlərin normallaşmasına və çoxdan gözlənilən sülh sazişinin imzalanmasına tərəfdardır. "Onlar Azərbaycan qoşunlarının Ermənistanın suveren ərazisindən çıxarılmasına, Beynəlxalq Məhkəmənin müvafiq qərarlarına hörmət edilməsinə və ötən il Azərbaycan Dağlıq Qarabağı yenidən tutduqdan sonra saxlanılan 23 erməni hərbi əsirin azad edilməsinə çağırırlar. Parlament üzv dövlətləri Azərbaycana bütün hərbi və mühafizə avadanlıqlarının ixracını dondurmağa çağırırlar, eyni zamanda xəbərdarlıq edirlər ki, Azərbaycanın Ermənistana qarşı gələcək hərbi əməliyyatları ciddi nəticələri olacaq", - qətnamədə deyilir. Sənəd 453 "lehinə", 31 "əleyhinə" səslə qəbul edilib, 89 nəfər bitərəf qalıb.