USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Avropada Azərbaycanlı Siyasi Mühacirlərin “Demokratiya Marşı” Keçirilib
ASİMCOM-un təşkilatçılığı ilə Avropada yaşayan azərbaycanlı siyasi mühacirlərin iştirakı ilə Fransanın Strasburg şəhərində “Demokratiya Marşı” adlı yürüş-mitinq keçirilib. Tədbir Azərbaycanda son dövrlərdə artan siyasi repressiyalara və insan hüquqlarının pozulmasına qarşı etiraz məqsədilə təşkil olunub.
Aksiya zamanı iştirakçılar “Tofiq Yaqubluya azadlıq!”, “Azərbaycanda siyasi məhbuslara azadlıq!” və “Azərbaycanda repressiyalara son!” kimi əsas şüarlarla çıxış ediblər. Etirazçılar, eyni zamanda, insan haqlarına hörmət olunması, siyasi təqiblərə və ifadə azadlığının məhdudlaşdırılmasına son qoyulması tələblərini beynəlxalq ictimaiyyətə və Azərbaycanın rəsmi dairələrinə çatdırmağa çalışıblar.
Bu yürüş-mitinq, son illərdə Avropada azərbaycanlı siyasi mühacirlərin təşkil etdiyi ən kütləvi və təsirli etiraz tədbirlərindən biri kimi qiymətləndirilir. Tədbirə müxtəlif Avropa ölkələrində yaşayan azərbaycanlı fəallar və insan hüquqları müdafiəçiləri qatılıb, birgə həmrəylik nümayiş etdiriblər.
Aksiyanın təşkilatçıları beynəlxalq ictimaiyyəti Azərbaycanda insan hüquqlarının müdafiəsinə daha fəal dəstək verməyə çağırıb və ölkədə demokratik dəyərlərin bərqərar olması üçün səylərin artırılmasının vacibliyini vurğulayıblar.
Tədbir, ümumilikdə, dinc və demokratik çərçivədə keçirilib və Azərbaycan xalqının azadlıq, ədalət və demokratiya arzularının ifadəsi kimi dəyərləndirilib.
