Şair İlkin Ziya "Meydan Tv işi" üzrə təqsirləndirilərək həbs edilmiş jurnalist, "Arqument.az" ın baş redaktoru Şəmşad Ağaya (Ağayev) şeir yazıb.

“Meydan TV işi” üzrə təqsirləndirilərək həbs edilmiş jurnalist, “Arqument.az” saytının baş redaktoru Şəmşad Ağayevə (Ağa) dəstək məqsədilə şair İlkin Ziya şeir yazıb.

Şairin qələmə aldığı şeir sosial mediada paylaşılıb və ictimaiyyət tərəfindən geniş rəğbətlə qarşılanıb. O, şeiri azad söz və ədalət uğrunda mübarizə aparan həmkarına mənəvi dayaq olmaq üçün yazdığını bildirib.

İlkin Ziya qeyd edib ki, jurnalistlərin həbsi yalnız ifadə azadlığına deyil, həm də cəmiyyətin vicdanına zərbədir:

“Bu gün yazan, danışan hər kəsin başının üstündə bir kölgə var. Amma Şəmşad bu kölgəni qorxmadan yarıb keçənlərdəndir. Biz ona dəstək olmalıyıq”.

Qeyd edək ki, Şəmşad Ağayev bu ilin martında “Meydan TV işi” çərçivəsində saxlanılıb. O, hazırda digər jurnalistlər və ictimai fəallarla birlikdə qaçaqmalçılıq və başqa ittihamlarla təqsirləndirilir. Lakin həm o, həm də vəkilləri bu ittihamları rədd edir, həbsi siyasi sifariş adlandırırlar.

“Meydan TV işi” üzrə ümumilikdə 10 nəfər barəsində cinayət işi açılıb. Onların arasında media nümayəndələri, vətəndaş cəmiyyəti fəalları da yer alır.

"Şəmşad Ağaya...
Bəlkə, sən də
uşaq vaxtı
əllərini birləşdirib,
divarda kölgədən
it kəlləsi düzəldən o,
uşaqlardan olmusan?
Nə bilək, Bəlkə də,
həmin itdən qorxublar,
biləyini həmin itin boynu bilib,
ona zəncir vurublar?
Nə bilək?!
Bəlkə, dırnaqlarını kəsib,
saqqalını qırxıb,
qazamatın pəncərəsindən atasan?
– azadlığa hissə-hissə,
parça-parça çıxasan?
Elə kövrəyəm, Ağa,
Udqunsam, elə billəm,
keçir sel boğazımdan.
İçimdə dustaq olan
bir qışqırıq var,
– qaçıb çıxmaq istəyir
tunel boğazımdan...
Necə ki, dünyaya zindan deyən kişilər,
məzar qazıb aradan çıxdılar, Ağa...
Qınamıram onları,
qorxdular, Ağa...
İlkin Ziya
5 iyun. 2025".