“Meydan TV işi” çərçivəsində həbs olunan jurnalist Fatimə Mövlamlı iyulun 4-də Bakı Apellyasiya Məhkəməsində keçirilən proses zamanı maraqlı bir dialoqu ictimailəşdirib. Onun “Facebook” səhifəsində yayımlanan açıqlamada hakim Ramin Qaraqurbanlı ilə aralarında baş verən söhbət diqqət çəkib.

Mövlamlının sözlərinə görə, məhkəmədə istintaqın təyin etdiyi ekspertiza 13 500 avro dəyərində olan və polis tərəfindən evindən tapıldığı iddia edilən 153 ədəd pul əsginasından yalnız 4-nün üzərində onun əl-barmaq izlərinin olduğunu müəyyənləşdirib. Jurnalist bu vəsaitin ona məxsus olmadığını, pulların polis tərəfindən evinə yerləşdirildiyini bildirib. O, ekspertiza rəylərinin “həqiqətə deyil, jurnalistləri girov saxlamaq üçün açılan saxta cinayət işlərinə xidmət etdiyini” vurğulayıb.

Çıxışı zamanı Mövlamlı bu fikirləri əlavə edib:
“Amma nəhayətində bu günlər ötüb keçəcək. Bizim üçün lap rahat keçəcək. Çünki haqlıyıq. Biz bu haqlılıqla, olduğumuz güclə həmişə başımız dik gəzəcəyik. Sizin yaxınlarınız, doğmalarınız isə adınızın hallandığı şər işlərə görə xəcalət çəkəcək, sizinlə eyni soyadı daşıdıqları üçün utanacaqlar.”

Onun bu sözləri hakimin reaksiyasına səbəb olub. Fatimə Mövlamlının bildirdiyinə görə, hakim çıxışını yarımçıq kəsərək ona belə danışdığı üçün həbs olunduğunu deyib.

Mövlamlı isə dərhal cavab verərək bildirib:
“Deməli, siz öz dilinizlə etiraf edirsiniz ki, mən qaçaqmalçılığa görə deyil, danışdıqlarıma, yazdıqlarıma görə həbs olunmuşam.”

Xatırladaq ki, Fatimə Mövlamlı “Meydan TV işi” üzrə bir neçə jurnalistlə birlikdə saxlanılıb və ona qarşı qaçaqmalçılıq ittihamı irəli sürülüb. Müdafiə tərəfi isə ittihamların siyasi motivli olduğunu və jurnalist fəaliyyətinə görə irəli sürüldüyünü bildirir.