Almaniyada yaşayan bloger Qabil Məmmədovun işi üzrə Azərbaycanda aparılan qiyabi məhkəmə prosesi yekunlaşıb. Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən iclasda ona 16 il müddətinə azadlıqdan məhrumetmə cəzası verilib.

Qabil Məmmədov Azərbaycan Cinayət Məcəlləsinin 24 maddəsi üzrə ittiham olunub. İttihama görə, o, 2015–2017-ci illər ərzində müxtəlif şəxslərə dövlət orqanlarında işə düzəltmək, onlara pensiya və sosial müavinət təyin etdirmək adı ilə vəd verərək ümumilikdə 10 nəfəri aldadıb və onlardan 29 597 manat pul alıb.

Bundan əlavə, istintaq orqanları onun sosial media hesablarında açıq şəkildə terrorçuluğa çağırışlar etdiyini bildirir. Toplanmış sübutlara əsasən, 2024-cü ilin iyulunda Qabil Məmmədova qarşı Cinayət Məcəlləsinin 178.2.2, 178.2.4 (dələduzluq), 182.2.1, 182.2.4 (hədə-qorxu ilə tələb etmə), 214.2.1, 214.2.2, 214.2.3 (terrorçuluq), 214-1 (terrorçuluğu təbliğ etmə), 214-2 (terrorçuluğa cəlbetmə), 233 (ictimai asayişi pozma), 315 (hakimiyyət nümayəndəsinə qarşı müqavimət), 186.2.1, 186.2.2 (əmlakı qəsdən məhv etmə və ya zədələmə) və 127.2.1 (qəsdən yüngül bədən xəsarəti yetirmə) maddələri üzrə yeni ittihamlar irəli sürülüb.

Lakin Qabil Məmmədov ölkə hüdudlarından kənarda olduğu üçün bu ittihamlar birbaşa elan oluna bilməyib. Bu səbəbdən, 2025-ci ilin yanvarında Binəqədi Rayon Məhkəməsinin qərarı ilə barəsində qiyabi həbs qətimkan tədbiri seçilib və iş üzrə proses onun iştirakı olmadan davam etdirilib.

Hazırkı hökmə əsasən, Qabil Məmmədov 16 il müddətinə azadlıqdan məhrum olunub.