Lənkəran Şəhər İcra Hakimiyyətinin başçısı Taleh Qaraşova qarşı sui-qəsd hazırlamaqda təqsirləndirilən Bəhruz Əskərovun cinayət işi üzrə məhkəmə prosesi başa çatıb.

Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən iclasda hökm elan olunub. Hökmə əsasən, 1988-ci il təvəllüdlü Bəhruz Əliməmməd oğlu Əskərov 15 il müddətinə azadlıqdan məhrum edilib.

Məhkəmə araşdırmaları Dövlət Təhlükəsizliyi Xidmətində (DTX) aparılan istintaq materiallarına əsaslanıb. İttihama görə, Bəhruz Əskərov digər şəxslərlə əlbir olaraq Azərbaycan ərazisində terror aktı törətməyə hazırlaşmaqda, əhali arasında vahimə yaratmaq, dövlət hakimiyyəti orqanlarına və beynəlxalq təşkilatlara təsir göstərmək məqsədilə ictimai təhlükəli hərəkətlər planlaşdırmaqda ittiham olunub.

DTX tərəfindən təqdim olunan sübutlara əsasən, Əskərov müxtəlif bölgələrdə yaşayan şəxsləri gizli əlaqəyə cəlb edərək, onlara Taleh Qaraşovun həyatına sui-qəsd təşkil etməklə bağlı tapşırıqlar verib.

Ona qarşı Azərbaycan Respublikası Cinayət Məcəlləsinin terrorçuluq, adam öldürməyə hazırlıq, dövlət xadiminə sui-qəsd və konstitusiya quruluşunu zorla dəyişdirməyə yönələn hazırlıqla bağlı ümumilikdə səkkiz maddə üzrə ittiham irəli sürülüb:
• 28,120.2.1; 28,120.2.10; 28,120.2.11; 28,120.2.12 – qabaqcadan əlbir olan bir qrup şəxs halında milli, irqi, dini ədavət zəminində adam öldürməyə hazırlıq
• 28,214.2.1; 28,214.2.3 – odlu silah və digər vasitələrlə terror aktı törətməyə hazırlıq
• 28,214-3.1 – terrorçuluqla əlaqədar təlim keçməyə hazırlıq
• 28,277 – dövlət xadiminin həyatına sui-qəsd etməyə hazırlıq
• 28,278.1 – konstitusiya quruluşunun zorla dəyişdirilməsinə hazırlıq

Xatırladaq ki, Bəhruz Əskərov barəsində cinayət işi üzrə həbs qətimkan tədbiri də tətbiq olunmuşdu.

Hadisə ölkədə yüksək vəzifəli məmurlara qarşı mümkün təhlükələrin nə qədər ciddi qəbul edildiyini və bu cür hallara hüquq-mühafizə orqanlarının sərt reaksiyasını bir daha göstərmiş oldu.