Azərbaycanda qeyri-hökumət təşkilatlarına (QHT) qeydiyyatsız xarici maliyyə müqavilələri əsasında fəaliyyət göstərmək qadağan olunur. Prezident İlham Əliyev bununla bağlı “Qeyri-hökumət təşkilatları (ictimai birliklər və fondlar) haqqında” və “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanunlara dəyişiklikləri təsdiqləyib. Bu barədə rəsmi məlumat president.az saytında yayımlanıb.

Dəyişikliyə əsasən, qeydiyyata alınmamış xarici maliyyə mənbələri ilə bağlanmış müqavilələrə əsasən QHT-lərin bank əməliyyatları aparması, vəsait qəbul etməsi və xidmət göstərməsi inzibati məsuliyyətə səbəb olacaq.

Yeni qaydalara görə:
• Xarici maliyyə müqavilələrini müəyyən olunmuş müddətdə qeydiyyata təqdim etməyən vəzifəli şəxslər 1500–2500 manat, hüquqi şəxslər isə 5000–7000 manat məbləğində cərimələnəcək;
• Qeydiyyatsız müqavilə əsasında maliyyə vəsaiti qəbul edən və ya xidmət göstərən vəzifəli şəxslərə 2500–5000 manat, hüquqi şəxslərə isə 8000–15000 manat aralığında cərimə tətbiq olunacaq.

Mütəxəssislər bu dəyişiklikləri QHT sektoruna nəzarətin daha da gücləndirilməsi kimi qiymətləndirir. Onların fikrincə, yeni məhdudiyyətlər və yüksək cərimələr vətəndaş cəmiyyəti institutlarının fəaliyyət imkanlarını məhdudlaşdıracaq və hakimiyyətin sektor üzərində təsirini artıracaq.