Hesablama Palatasının Dövlət Turizm Agentliyində 2021–2024-cü illəri əhatə edən auditinin nəticələri rəsmi olaraq açıqlanıb. Audit zamanı Agentlikdə ümumilikdə 18,5 milyon manatlıq maliyyə pozuntusu aşkarlanıb. Açıqlanan rəqəmlər və ortaya çıxan faktlar qurumun fəaliyyətində ciddi idarəçilik böhranının yaşandığını bir daha təsdiqləyib.

Qeyd edək ki, Dövlət Turizm Agentliyinə 2018-ci ildən Fuad Nağıyev rəhbərlik edir. Onun və rəhbərlik etdiyi qurumun fəaliyyəti illərdir medianın, ekspertlərin, bəzi deputatların və ictimaiyyətin sərt tənqid hədəfindədir. İddialara görə, Nağıyev ölkə turizminin inkişafı üçün qarşıya qoyulan vəzifələrin öhdəsindən gəlməkdə ciddi şəkildə aciz qalıb.

Bu ilin əvvəlindən Agentlik ətrafında baş verənlər isə tənqidlərin əsassız olmadığını ortaya qoyub. Belə ki, martın 4-də Dövlət Turizm Agentliyi Aparatının əməkdaşı Nicat Hüseynov Dövlət Təhlükəsizliyi Xidməti tərəfindən saxlanılıb. O, xidməti səlahiyyətlərindən sui-istifadə etməkdə ittiham olunur və barəsində Səbail Rayon Məhkəməsinin qərarı ilə həbs qətimkan tədbiri seçilib. Bir neçə gün öncə onun həbs müddəti iki ay daha uzadılıb.

Əməkdaşın həbsi fonunda Prezident İlham Əliyevin sərəncamı ilə Agentliyin rəhbəri Fuad Nağıyevə şiddətli töhmət elan olunub. Rəsmi izahda bildirilir ki, bu cəza onun işində yol verdiyi nöqsanlarla əlaqədardır.

Lakin yerli mediada yayılan məlumatlar daha dərin problemlərə işarə edir. İddialara görə, Agentlik daxilində xidməti yazışmaların və məlumatların xarici təşkilatlara və səfirliklərə sızdırılması baş verib. Bu sızmaların arxasında isə “Transparency International” təşkilatı ilə əlaqəsi olan şəxslərin durduğu iddia edilir.

Bütün bu qalmaqallara, maliyyə pozuntularına, əməkdaşın həbsinə və rəhbərin şiddətli töhmət almasına baxmayaraq, Fuad Nağıyev hələ də vəzifəsində qalmaqdadır. Bu isə ictimaiyyətdə haqlı narazılıq və suallar doğurur: bu qədər ciddi pozuntulardan sonra niyə məsuliyyət hələ də yalnız aşağı səviyyəli əməkdaşla məhdudlaşdırılır?