İsrailin Qəzza zolağını blokadaya alması nəticəsində yaranan dərin humanitar böhran azyaşlı uşaqların həyatını təhlükəyə atmaqda davam edir. Aclıq səbəbindən 9 yaşlı Meryem Devvas çəkisinin yarıdan çoxunu itirib.

Qızcığazın 33 yaşlı anası Müdellele Devvas bildirib ki, müharibənin başladığı gündən bəri Meryem qida çatışmazlığından əziyyət çəkir. Ananın sözlərinə görə, vəziyyət son zamanlar sərhəd keçidlərinin bağlanması ilə daha da ağırlaşıb:

“Qızımı çox xəstəxanalara apardım, amma heç bir nəticə görmədim. Müharibədən əvvəl çəkisi 25 kilo idi, indi 10 kilo olub. Cənub və şimalda bir çox xəstəxanalarda olmuşuq. Heç kim kömək edə bilmir.”

Müdellele əlavə edib ki, Meryem psixoloji çöküntü yaşayır, əvvəlki kimi oynamaq istəyir, lakin tez yorulur və yuxuya gedir. Onun sözlərinə görə, aclıq və müharibə Meryemin uşaq kimi yaşamaq haqqını əlindən alıb.

BMT və digər beynəlxalq təşkilatların dəfələrlə xəbərdarlıq etdiyi kimi, İsrailin Qəzzaya ərzaq və tibbi yardımın daxil olmasına imkan verməməsi fəlakətə səbəb olur. Son rəsmi rəqəmlərə görə, Qəzzada aclıq səbəbilə həyatını itirənlərin sayı 180-ə çatıb. Onlardan 93-ü uşaqlardır.