Dövlət Satınalmaları Portalının məlumatına görə, “Az.Arxitektura” MMC son dörd ildə 9 milyon manatdan çox dəyərində tender müqavilələri imzalayıb. Şirkət, digər firmaların əldə edə bilmədiyi imtiyazlara görə Azərbaycan mətbuatında tez-tez gündəmə gəlir.

Meydan TV-nin araşdırmasına əsasən, “Az.Arxitektura” MMC ən son Bakı şəhərinin mərkəzində – 28 May küçəsindən “The Ritz-Carlton Baku” otelinə qədər olan 12 hektarlıq ərazidə salınacaq yeni istirahət parkının layihə-smeta sənədlərinin hazırlanması tenderinin qalibi olub. Layihə üçün şirkətə 2 milyon 387 min 833 manat 84 qəpik ödəniləcək.

Tenderi Bakı Şəhər İcra Hakimiyyətinin tabeliyindəki “Bakı Şəhər Əsaslı Tikinti və Təmir” MMC keçirib. Bundan başqa, “Az.Arxitektura” MMC Ağdamın 4 kəndinin layihələndirilməsi işlərini də həyata keçirərək 2,2 milyon manat qazanıb.

Şirkətin təsisçisi kimdir?

2019-cu ildə yaradılan “Az.Arxitektura” MMC-nin nizamnamə kapitalı 5 min 10 manatdır. Hüquqi ünvanı Bakının Binəqədi rayonu, 7-ci mikrorayonda yerləşir. Şirkətin qanuni təmsilçisi 22 yaşlı Yunis Şükürlüdür.

Yunis Şükürlü Yeni Azərbaycan Partiyasının Göyçay rayon təşkilatının sədri, “Tərəqqi” medallı Sahib Şükürovun oğludur. Sahib Şükürov əvvəllər Göyçay Mədəniyyət və Turizm şöbəsinin müdiri, Ağdaş Regional Mədəniyyət və Turizm İdarəsinin rəis müavini olub.

Tenderləri udan ikinci şirkət

Yunis Şükürlü həm də 2022-ci ildə – 19 yaşında – “Global Engineering Management Company” MMC-ni yaradıb. Bu şirkət də əsasən dövlət qurumlarının layihə-smeta sənədlərinin hazırlanması tenderlərinin qalibi olub. Son üç ildə 30 tender udub. Maraqlıdır ki, şirkət ötən il etibarsız təchizatçı reyestrinə daxil edilib.

Əlaqələr və suallar

Hər iki şirkətin qısa müddətdə milyonlarla manatlıq tender qazanması, onların arxasında güclü siyasi əlaqələrin ola biləcəyi ehtimalını gündəmə gətirir. Sahib Şükürovun hakim partiya strukturlarında vəzifə sahibi olması tender proseslərinə təsir imkanları barədə suallar yaradır.

Yunis Şükürlünün gənc yaşda bu miqyaslı layihələri idarə etmək üçün təcrübəsinin yetərli olub-olmaması, dövlət satınalmalarında ədalətli rəqabətin mövcudluğu ilə bağlı şübhələri artırır.